格老暗示暫無加息需要，港股短期解除一大威脅，因此美股前晚雖然有回吐，但對港股冇影響，恒指再升126點，收11217。買盤動力依然勁，成交有96.8億元。
美股隔晚回吐，長實（001）噚日初段低見71.25元，提供低吸長實Call輪9063機會，趙飛雲喺0.43元買咗10萬份，事後怪自己太謹慎買得少。
技術上，長實已升近阻力位，不過有分拆生化業務7月上市消息支持，或者可以再抽高啲，短期就算有整固，中線都會跑贏大市。美林噚日調高中港股市評級，長實作為恒指主要成分股，當然亦受惠。
長實輪9063收0.52元，現有帳面利潤兩成，暫以0.47元作止賺位持有。恒指輪9045再升9%收0.222元，將止賺位推上0.21元。
資金近日集中追捧藍籌及藍籌輪，中資股及二三線難免受冷落。不過藍籌及藍籌輪炒到咁上下，相信會有獲利回吐轉炒中資股及股仔，不妨先揀定心水。早輪短炒過嘅重慶鋼鐵（1053）三角旗整固近尾聲，不妨望多兩眼，若突破1.18元，可追入。
趙飛雲