我求大俠前晚睇巴西作客葡萄牙嘅直播賽事，一心想睇吓「哨牙仔」同巴西國家隊嘅近況，話晒祖國球員喺決賽周會同呢班球星交手，結果真係嚇咗我一跳。
朗拿度（Ronaldo）只係踢咗上半場，不過同李華度（Rivaldo）、朗拿甸奴（Ronaldinho）嘅「R串燒三兄弟」首次合作即有火花，三個人夾埋一齊就喺禁區頂短傳入楔製造射門機會，淨係朗拿度都有三、四次機會可以入波，如果唔係葡萄牙門將列卡度表現神勇，哨牙仔早就有「士哥」。我求大俠睇完場波真係戥江津擔心，怕且佢都要有「少林足球」齣戲裏面三師兄「田雞」嘅身手先至頂得住！
「小超」旗下嘅互聯網公司前晚收費播葡萄牙對巴西嘅直播，據以往經驗喺互聯網直播足球都唔多掂，但呢次直播無論畫質同速度都認真唔錯，至少唔會窒吓窒吓；球員個樣都睇得好清楚，重有講波佬旁述，唔少網友都話正之後重有兩場熱身賽睇，大家不妨留意。
阿仙奴領隊雲格話為咗專心同隊波攞雙料冠軍，決定喺球季完結前唔開手機，費事啲經紀打嚟同佢sell球員。咁睇除咗反映出市道唔好，好多球員都要搵班落，重有大家都認為，阿仙奴都係幾富貴，啲經紀知佢哋出得起錢，咪猛同佢哋sell球員囉。不過話時話，我求大俠都覺得如果「兵工廠」要稱霸歐洲，個別位置真係唔多夠班喎！
德國同阿根廷前晚話名就踢友賽，但踢落一啲都唔友誼，球證總共向兩隊球員出示咗五面黃牌；老實講呀，如果球證唔係吹得鬆，睇怕德國嘅謝利美斯早就被趕出場。唉！鬼叫佢哋係球場宿敵咩，為咗面子梗係唔想輸啦，所以班球員咪去到盡囉。
真係世事難料！身為上季東岸季後賽亞軍嘅公鹿，季初係威係勢，做咗東岸二哥一排，點知後期愈打愈走樣，𠵱家連季後賽都入唔到，認真羞家，話就話傷兵打擊啫，但你睇吓人哋速龍冇咗卡達同76人冇咗艾華遜咪一樣掂，相信好多人都認同呢支球隊嘅表現肯定係今季最令人失望，睇怕今個夏天班波要好好反省吓囉！