伏明霞啱啱至喺香港打咗個轉，噚日又輪到傳聞同佢決裂嘅葉靜子出現。葉靜子噚日喺中環文華酒店歎茶，問佢知唔知小伏前幾日喺香港？佢話自己啱啱喺大陸返啫。咁梁伏戀公開咗後，同小伏係咪生疏咗，他日再見會唔會尷尬？葉靜子話：「係少咗聯絡，大家都忙嘛，我話咗祝福佢哋㗎啦！」再問佢梁伏戀公開後，好似少咗個朋友咁，覺唔覺得唔開心？佢就話：「我唔想講啦，總之明白我嘅人知乜事就得啦！」最後佢重歎口氣話：「咁都俾你哋撞到，我真係可憐呀！」
後來，葉靜子再打電話畀八方，佢話自己前晚同霍震霆食飯，原來葉靜子想幫中國跳水好手蕭海亮申請嚟香港，作為香港代表隊嘅成員。
另一方面，八方早前寫過記協喺下個月嘅籌款晚會，請咗阿松做嘉賓，重想安排佢唱情歌，原來記協前排重寄咗封信畀葉靜子，請佢買枱籌款，不過伊人遲遲未覆。其後梁伏戀曝光，記協又隨即發邀請信畀喺北京嘅伏明霞，希望佢同阿松雙雙做嘉賓，如果伏小姐肯賞面，咁就肯定要撲飛。
E-mail：