謝霆鋒上周五被廉政公署拘捕，指他涉嫌妨礙司法公正。霆鋒被扣留三十六小時後，以十萬元保釋，接着一直被傳媒追訪。不知霆鋒是否為遮掩自己的愁容，每次外出都配上不同款式的墨鏡，記者日前往旺角頂好眼鏡，找老闆Simon對霆鋒的墨鏡作出品評。 採訪：汪正文
上周六霆鋒被廉政公署扣留三十六小時，保釋離開後往母親狄波拉住所時佩戴的墨鏡，Simon表示為意大利品牌Exte出品，Simon說：「呢款係Exte嘅出品，係上年夏季嘅產品，呢款眼鏡個鏡片比較大，可以修飾臉形，而Exte嘅眼鏡設計比較精緻，主張從經典款式上尋求突破。佢年頭梳咗個『丁蟹頭』去頒獎禮時都戴過，價錢一千蚊左右。」
本周一晚霆鋒獲釋後重投工作，到佐敦錄音室錄音時佩戴的太陽鏡，Simon表示為Prada的最新出品。Simon說：「呢款太陽眼鏡係Prada今年最新出品，屬於日本版，香港要喺今年六、七月第一批先會到，所以香港暫時冇得賣，佢應該係喺日本或者外國特別專門店度買，價錢大約千六蚊。」
Simon指霆鋒本周二登上老闆楊受成的「GoldenTimes」遊艇曬太陽時，所佩戴的銀色金屬框太陽眼鏡為JeanPaulGaultier的絕版貨，他說：「呢款太陽眼鏡係JPG嘅絕版貨，大約喺五、六年前出廠。𠵱家已經停咗生產，香港亦都好少會見到，佢呢款墨鏡金屬味會重啲，同個框邊會貼面啲，當時價錢約千二至千三蚊。」
霆鋒前日出外見律師時，戴的是Chanel。Simon說：「呢一款係Chanel第一代，約一千二百蚊，大概喺前年出，香港𠵱家都已經冇呢款眼鏡。呢副眼鏡嘅特色，係膠框柄外面係黑色，入面係黃色，玻璃鏡片就係橙黃色。呢款眼鏡啱低調嘅人，近排霆鋒咁多新聞，佢都要低調啲。」