跳水皇后伏明霞日前來港會男友阿松，噚日終於離港，傳媒鬆一口氣。
伏明霞下午二時許，喺影圈新人張鎧潼陪同下，在赤鱲角機場出現，準備飛返北京。只見伏明霞孭住一個大袋，推住一個重達二十六公斤的行李喼同手提袋，看來在港大豐收，問伏明霞是否來港探男友，佢即刻話：「你哋講咋！」估唔到佢啲廣東話咁好；再問她是否住在男友家，是否壓力好大等，佢都笑而不答。
伏明霞面對住兩個記者，初時還顯得從容不迫，縱使被途人指指點點，有點尷尬，直至一大班記者蜂擁而至，閃光燈閃個不停，伏明霞終有點不耐煩：「你哋咁樣我唔開心，太恐怖。」
之後記者發現梁家輝正排在伏明霞前面辦理登機手續時，伏即借機話：「啱啦，你哋影佢啦！」而梁家輝就同伏明霞搭同一班機飛去北京。
E-mail：