美股裂口升，港股破悶局。趙飛雲前晚睇美股，只係瞓得3粒鐘，但噚日精神爽利，皆因有錢贏，如果噚晚能夠中埋2億3T，咁就真係perfect啦。
噚日晨早走去證券行追買恒指Call輪9045，喺0.183元買咗50萬份，睇啱市總算有回報。
恒指由頭升到尾，以全日高位11090收市，大升302點，配合94億元大成交兼升破萬一點阻力，後市可以抽高啲，短期阻力3月頂部11400，升得穿下個位睇萬二點。
趙飛雲手上嘅恒指輪9045現時有逾10%利潤，短期策略，若恒指上試11400受壓，亦即9045上試0.26元不破，可先行計數；如先回頭考驗萬一點支持，則9045未跌穿0.193元仍可持有，穿位則先計數。
佑威（627）微升1仙，收0.72元，表現不過不失，繼續持有。光通數網（155）早段尚企於2.1仙，之後逆勢而行，於2仙沽出止賺，等候低位再撈番。藍籌股中仍係長實（001）可睇高一線，候整固至71元附近，伺機買番啲長實Call輪9063。
趙飛雲