港股噚日跟住美股勁升逾300點，呢季賣嘅盈富基金（2800）清晒倉，壓力已經消除，後市可以自由升跌，不受對沖基金影響。不過，後市方向仍要視乎格老心情靚唔靚，如果佢突然唱話美國經濟好轉兼擴張過速，則美國息口可能會加快上升，港股就會危危乎。另外，如果本港今日公布嘅失業率升至7％，可能會令市場氣氛轉趨悲觀。
光通信（603）噚日終於停牌，有待公布國內投資天然氣項目進展。此股近日有唔少大戶掃貨，孖展客捧場亦唔少，所以此股停牌，肯定會對孖展客構成壓力，復牌後可能會出現一陣震倉，令股價下滑。不過由於此股已被強者睇中，將要勁炒。如果真係傾得成天然氣項目，不妨趁低吸納博反彈。
盈榮集團（1104）大股東近期不斷減持，持股量由76.55％減至57.31％，但股價喺佢減持期間累積上升超過80％，噚日收0.83元，好似大股東唔係減持而係增持咁款，令市場感到非常驚奇。Cookie話，此股本來就貨源歸邊，就算大股東減持，都可能係配晒畀國內友好人士，而且部分可能設有禁售期，因此減持亦唔會影響股價。大股東係國內富豪，應該都有唔少國內朋友捧場，跟佢一齊玩。
駿科網絡（8081）噚日急升49％，收0.58元。公司話唔知發生咩事，股份亦冇停牌。ｉ師傅話，公司業務今年將會大躍進，遲啲重可能會派息，所以有人偷步入市掃貨，掃掃吓股價就升咗上去。
阿 虎