玩具大王旭日國際蔡志明嘅新居啱啱曝光，蘭西收到料，佢上個禮拜日揸住架法拉利去海名軒視察，睇吓個價值8000萬嘅頂層複式單位裝修搞成點，名車配豪宅，襯到絕。
華懋廣場寫字樓租金持續下跌，刺激租務市道向好，3月份香港同九龍區寫字樓承租個案比2月多逾30%，而承租樓面就增加24%。由於租金仍有下調壓力，市場就傳華懋尖沙嘴華懋廣場，若租用8000呎，免租期可達8個月，但中原鄭繼標就話，呢個放租個案係「流料」，並無其事。
美聯物業同港置噚日響中環鏞記搞咗個「英雄宴」，點解咁叫，原來係因為嗰度3樓原先有個牌匾寫住「射鵰英雄傳」。
不過，三樓咁啱裝修緊，所以個飯局移師去咗4樓；但美聯黃主席話鏞記較嘈，下次可能會將「英雄宴」地點改喺蘇浙同鄉會。
早前由順豪資源（253）買入嘅西營盤高街楊華閣，現委託中原代理銷售，今日舉行簽約儀式。
楊華閣係粵海債權人物業，順豪以每呎低於2000元嘅價錢購入，今次拆售，應有利可圖。
蘭西