勢估唔到紐約人嘅史比維爾喺上個禮拜日就因為瞓過龍缺席咗球隊嘅操練，點知就俾球會罰咗成十二萬五千美金，足足九十七萬幾港幣。嘩！一時唔知醒就唔見咗成百萬，好似離譜咗啲噃？
我求大俠一向都支持球隊要紀律嚴格，但係缺席一場練波，又唔係比賽冇到，何況NBA嘅慣例係缺席練波通常罰二千五百美金，但今次史比維爾嘅罰款足足超額五十倍，肯定有內情同手尾跟，難怪史老兄發誓一定上訴。
重有，紐約人中鋒甘比上季亦試過比賽時毆打馬刺嘅前鋒費利，當時俾NBA罰咗二萬五千美金、停賽六場兼扣人工，但經過上訴後，甘比被扣六場嘅三十四萬五千美金人工，最後獲得減免近六成。希望史比維爾今次都可以上訴成功，否則NBA就出現雙重標準嘞。
古妮高娃喺舊年最性感女球手選舉輸畀奧地利嘅史卓迪，今年繼續做「二奶」，不敵冇乜知名度嘅斯洛伐克十八歲靚女韓迪卓娃，唔單止咁，呢位俄羅斯美人嘅贊助商早排講到明如果佢再唔生性贏啲錦標威吓，就會飛起佢咁話，係囉，古妮高娃應該知道得個靚字唔可以食成世，真係唔該佢喺場上醒少少啦！
熱刺領隊荷杜認真有冒險精神，唔係點會夠膽簽出晒名玻璃腳嘅列納返嚟，重要簽四年咁耐。老實講，我求大俠都好認同列納呢位英格蘭中場好好波，傳射功夫都達世界級水平，但弊在容易傷兼成日傷。佢近兩季幫利物浦踢唔夠十場比賽，個底差成咁，如果佢唔係唔使錢，睇怕荷杜唔會簽佢。
曼聯嘅英格蘭後衞布朗認真黑仔，啱啱先至話有機會參加世界盃，點知日前練波時整親隻眼，踢唔到前晚對葡萄牙小國腳場友賽，搞到總教頭艾歷臣冇辦睇，睇嚟去日韓嘅成數真係唔高。不過，布朗重後生，今屆冇份踢，咪等下屆囉。
意大利最有江湖地位嘅球證哥連拿被禁止執法意甲前列球隊嘅比賽，最近壓力少咗同埋得閒啲，於是意國足總準備搵佢向班國腳講解球例之餘，重教佢哋點樣避免被罰十二碼。呢個安排認真一流，因為近年意大利球賽犯規似乎特別多，球員應該要學下點走法律罅。
求驗客手記逢星期一至五刊出
E-mail: