肥仔H參加遊行抗議，本來乃屬常事。佢哋個黨搞示威，無日無之，對一切手續熟過醬油，有時事先向警方申請，有時特登唔早啲申請，皆因應策略需要，唔係亂咁嚟。
星期日早上，肥仔H話：「下午參加反戰示威，由維多利亞公園行去美國領事館抗議。」反戰關美國乜嘢事？不過示威唔去美國領事館，又去得邊，唔通去特區政府總部乎？又或者去日本領事館乎？喺好多人心目中（唔淨止香港人），美國乃係戰爭嘅象徵，由讀書時反越戰開始，四十年來，冇美國牌打嘅話，大家會寂寞到死。
反戰就反戰喇，各人有自己自由，唔應阻止。但肥仔H咕咕聲咁話：「啲本地猶太人組織好犀利，我哋講緊反戰示威，討論議而不決，未正式向外宣布之時，猶太人組織已經向我哋主席表示關切，又話知道我哋講乜嘢，希望我哋唔係反猶太。」犀利？唔算咯，如果睇番一啲間諜小說，內容或有誇大之處，就會知道以色列嘅特務機關Mossad嘅厲害，就算信佢三成，香港人都會俾佢嚇死。我哋過慣太平盛世，毋須憂慮戰爭與國家安全，喺猶太人與巴勒斯坦人眼中，香港人係十分naive嘅。
瑞士人最聰明，歷年來力保中立，左右逢源，一個寡民小國，經歷無數戰爭，始終屹立不倒。你估瑞士人唔識猶太與巴勒斯坦之爭乎？儍啦，佢哋知道得比香港人更多，不過人哋更有內涵而已。