商台同《Penthouse》雜誌前晚喺跑馬地CORNERLounge合辦「戀上你的牀PenthouseCoverGirl」，共有六位佳麗參賽，最後由2號陳明心勇奪「最燦爛笑容大獎」同「封面女郎大獎」，佢將會成為五月號成人雜誌封面女郎，另一個獎「最誘人身段大獎」就由6號胡麗芬奪得。
前晚參賽佳麗中，8號洋洋以前係落選女優，4號喳喳亦參加過之前有線主辦的CATGirl選舉，可惜二人今次均名落孫山。而前晚參賽佳麗除咗着泳衣，重要喺張床度做出自選誘人姿態，但評判之一李婉華就嫌佢哋唔夠放。
另外，李婉華提到霆鋒事件，亦有感而發話：「後生仔邊個唔血氣方剛呀？出面一面倒話佢唔啱，但有得揀我都揀任性。」
憑一首《你老豆咪索K》紅遍的士高嘅地下樂隊MP4，佢哋新碟中一首反映民意嘅新歌《打工仔心聲》，因為字眼敏感，電台已經唔多肯播，就連路訊通都要佢哋刪啲字眼先肯播，黃秋生聽到呢件事即刻撐MP4，秋生話：「MP4憑歌反映民意都唔得？咁係咪要啲歌手個個唱我愛你你愛我就得，流行歌手橫刀奪愛就好，我認為MP4應該寫信去國際人權組織，或者去平等機會委員會告佢哋。」
陳浩民噚日攞住個行李篋返無綫電視城拍新劇《打更急先鋒》，原來浩民前日去咗北京為中央電視台劇集《銀鼠》宣傳，由於浩民去到北京日夜不停做訪問，所以冇覺好瞓，佢話：「今次幫中央台拍劇真係覺得好榮幸，呢套劇籌備咗四年，我係第一男主角，套劇重喺黃金時段播。」
早前喺《智在必得之智奪黃金屋》贏咗層二百二十萬單位嘅李錦耀，噚日去將軍澳，喺節目主持人鄭丹瑞手中攞咗「清水灣半島住戶證」，正式成為業主，佢入到間屋，就四圍咁睇，佢重話：「呢度啲環境好靚。」
張徹導演成為今屆「香港電影金像獎」嘅「終身成就獎」得主，為咗咁佢寫咗封信嚟，話出年就八十歲，要到呢個年紀先攞呢個獎，但佢都好開心，亦要多謝「金像獎」大會。重有佢話𠵱家年紀大，唔可以再做導演，但佢仍然係中國星嘅顧問，佢話同劉德華以前只合作過一部戲，但佢對華仔好有好感。
台灣二人人氣組合WEWE噚日接受商台《發式早餐》訪問，對香港嘅美食讚不絕口，特別對港式飲茶情有獨鍾，佢哋最可惜嘅係冇去海洋公園同山頂睇夜景。而對於陳奕迅喺台灣發生意外，成員之一李威話：「好像幾嚴重，不過意外好難避免，小心點就好。」而李威噚晚就先返台拍劇。