阿媽年代嘅雙頭石油氣爐設計，估唔到會偷橋落Hi-Fi設計上，KENWOOD呢部最新從日本抵港嘅雙頭爐Hi-FiAvinoSJ-9CDR，除咗擁有一般AudioCD同MD播放功能之外，重加入咗非常罕有嘅燒碟功能，咁以後你就可以一邊煲碟聽音樂，一邊燒錄音樂光碟啦！ 記者：朱崇德
攝影：黃子偉
第一眼望見呢部AvinoSJ-9CDR，感到佢真係近年少見嘅型仔Hi-Fi，玻璃面設計雙唱盤，加上一個鏡面加大碼Display，淨係呢兩點已非常夠殺，加上四隻假高腳同機面金屬銀色控制鍵，有一種強烈嘅懷古味，凸顯出這部機的個人風格。
賣相懷古，功能卻反其道地非常新穎！全機重點是機面兩個唱盤，它們各具個性，錄歌播歌功能亦有所分別；左邊是可作多用途播歌的光碟唱盤，除一般AudioCD之外，重可以讀到用MP3同WMA音樂格式錄製嘅光碟，最啱喜歡用電腦玩數碼音樂嘅人。
右邊嘅光碟唱盤，加入非常方便嘅光碟燒錄功能，用家輕按機面嘅「CDRrec」按鍵，就可以直接將AudioCD或MD的音樂，燒落空白的CD-R/RW！為咗編製CD-R/RW歌集可以更富彈性，AvinoSJ-9CDR加入了Finalize功能；未經Finalize程序的CD-R/RW音樂光碟是不能在普通CD機上播放。用家燒碟時可隨時寫入音樂歌曲檔案，直至寫滿後，只需一啟用Finalize功能，這片音樂光碟就正式完成，可以在兼容CD-R/RW的光碟機上播放（現時一般新出的Hi-Fi都可以兼容），認真方便。
至於MD功能方面，有齊播放、錄音、MDLP同編輯英文歌名，唯一不足之處是未加入NetMD功能，雖則KENWOOD同期推出了一隻連NetMD嘅AvinoSJ-9PC，不過買機時就要硬食一部行CuroseTM800MHz嘅Notebook，重要成$19,000，你都咪話唔得人驚！由於兩部機嘅差額咁大，如果你真係好想將電腦嘅數碼音樂轉錄MD，可以用電腦先將MP3音樂燒成光碟，然後再用光碟翻錄落MD，過程可能會較繁複同失真，不過近萬二蚊嘅差額，筆者覺得絕對彌補到我心靈上同時間上嘅損失！
呢部機賣相型仔，但令人有擁有嘅衝動，都係來自佢個燒碟功能；由於主機要肩負起燒錄CD-R/RW光碟嘅任務，所以來電位改設在Sub-Woofer之上，然後再由佢分電畀主機，的確可以非常有效地防止主機過熱而燒壞碟，甚至對Hi-Fi內部零件造成損傷！但由於這部機是日本水貨，電壓亦是大家要小心提防的問題！
店舖：華仁會
地址：旺角花園街75-77號花園商業大廈5、6樓
電話：23980280
網址：