在大陸搞食肆，選址一定要人流多，店舖夠寬敞舒適。若論深圳最旺區，必屬羅湖區嘅東門步行街，儼如香港嘅銅鑼灣一樣，但香港寸金尺土，要開間大型食肆租金必定昂貴。而今次嘅主角英姐，就在丈夫的協助下，喺東門開咗間「花田家迴轉壽司」，雖然開業只有三個月，但生意愈做愈旺，相信佢投資嘅60萬金額，好快就本利歸還。
記者：梁煒健 攝影：林栢鈞
1地方清潔：尤其廚房乾淨係最重要一環。
2保持水準：食物嘅品質一定要保持水準，否則自然會令食客流失。
3環境舒適：地方舒服寬敞，行過都忍唔住入嚟啦。
4待人有禮：否則即使食物點靚，員工趕客一樣得不償失。
構思
英姐由92年至今，在港一直從事洗衣店行業，由於丈夫森哥喺日本從事食肆已有8年經驗，加上兩人覺得喺深圳搞日本料理大有所為，所以英姐喺丈夫協助之下，於去年12月中，喺羅湖東門步行街鴻展廣場一樓投資60多萬人民幣，開辦她的第一間「花田家迴轉壽司店」。
選址
如果大家有去羅湖東門一帶逛街，必定發覺所有大型食肆均設於一樓或以上，例如麥當勞、家鄉雞等大型食府就係嘞！加上整個東門步行區，論最旺就只有太陽廣場附近嘅十字路口位置，而鴻展廣場就在太陽廣場對面。
適逢鴻展廣場一樓去年有吉舖出租，加上2,000呎舖位只需3萬8千蚊人民幣，英姐左計右計後，覺得開設一間大規模嘅迴轉壽司店必定有得做，何況東門港客最多，附近亦只有一間小型日本拉麵店㖭，生意毫無影響。
裝修
做任何食肆，最大投資必定係廚房爐頭及其他煮食工具，幸而英姐有親戚喺深圳做裝修公司，喺自己友幫忙下，其店內嘅裝修費用就比市面平30%有多。
現時喺深圳訂做一條迴轉壽司路軌，造價約13萬人民幣左右，已包括吧枱水龍頭位。
除咗煮食爐具，店舖內嘅枱枱櫈櫈，亦係嚟自國內最平兼最優質嘅家具盛產地順德。而啲高櫈原本開價每張要?120，但森哥則以超筍價每張?60購入。每樣慳一大半，全店嘅投資成本就大大減輕，她相信喺深圳，冇人可以只用43萬就做到一間2,000呎日本料理嘅裝修。
食物
為咗迎合港人對日本料理嘅飲食習慣，除咗有壽司及和食(如串燒、天婦羅等)外，花田家亦有鐵板燒食物，而最旺嘅時段為假日晚膳時間7:00至9:00。由於花田家係東門唯一一間有齊三種日式料理的食肆，加上食物收費不貴，吸引到不少港客光顧。
其實，在深圳也有不少代理或批發日本食物的公司，但從哪裏取貨，英姐則謂是商業秘密。
「花田家」現時做緊一個日式特價自助餐，有齊各款壽司之餘，另有鐵板燒、串燒、天婦羅等食物，收費只需?88就可享用。
員工
做食肆除咗食物要好味、地方要舒適寬敞外，服務人客之道亦一樣重要。所以英姐喺正式聘請侍應之前，需替員工作一個月培訓，主要教導簡單嘅日語及禮貌，因為呢處周不時有日本遊客光臨，到時侍應們便懂得應對。
能用日語簡單應對之餘，每位女侍應都會穿着整齊嘅和服，襯吓店舖嘅氣氛。此外，由於深圳對外開放多年，國內已有不少經驗豐富嘅日本料理廚師，所以「花田家」嘅鐵板燒大廚，也有五年以上做日本料理嘅經驗，煮出嚟食物亦有一定水準。
英姐除咗要管理人事及財務上問題外，亦周不時要親力親為招呼顧客，也給員工們作一個好榜樣。
大計
由於英姐及其丈夫已長期居住於深圳，約3個月先返港一次，所以對深圳嘅飲食文化相當了解。雖然「花田家」開業只有3個月，但早已上了軌道，生意蒸蒸日上；未來大計希望可以開多一間連鎖分店，除咗有夜市嘅羅湖區外，高尚嘅福田商業區亦喺選擇之列，還可吸納當地嘅白領階層及從商顧客，不過現時仍待商討。
1.找合適舖位後與業主簽訂租約，作為地址證明。注意在東門步行街，地下不能開設食肆，小吃零食店除外。
2.到羅湖區工商分局以個體戶形式申請工商牌照。
3.申請稅務執照（包括國稅和地稅），可往深圳稅務處辦理，約一星期便可。
4.衞生牌照需向羅湖區衞生檢役站申請，費用約?200。
5.開辦食肆最重要申請消防牌照，需在裝修之前先出示圖則去報批，而申請處為羅湖消防中隊。
深圳市工商行政管理局電話：5520397；網址：
花田家迴轉壽司
投資日期：2001年12月
租金 ?76,000（約2,000呎連1個月按金）
裝修 ?430,000
人工 ?15,000（廚師8名及侍應7名）
宿舍 ?2,500
入貨 ?20,000
雜項 ?27,000（水電、煤氣及醬油等）
流動資金 ?35,000
總投資金額 ?605,500
平均每月營業額 ?300,000
平均每月盈利 ?35,000
目標每月盈利 ?130,000