早前，亞Mark曾經話過，嚟緊平治代理嘅仁孚行，將會繼新E-Class之後，喺5月又會推出全新嘅CLK車系；繼後6月佢哋又會正式引入傳聞多時，終於等到有右軚版生產嘅Smart迷你小車抵港。
雖然Smart面世經已有一段時間，但睇嚟佢嘅受歡迎程度，卻沒有半點冷卻，至少近期亞Mark外出公幹，響歐洲街頭碰到嘅Smart，幾乎數目重多過啲的士呢！之不過話時話，靜靜雞講個消息畀大家知，查實香港代理經已引入咗幾部右軚Smart抵港喇！當中重包括有至新嘅開篷Smart小車㖭！事關佢哋要做政府驗車等各項預備嘛！至於車價方面，聽聞代理方面重同廠方周旋緊，希望呢部Smart嘅定價，能夠喺15萬上落就好喇！