小初早排聽見百仕達（1168）話想配股，但一直只見股價炒來炒去，但就唔見成事。經紀陳噚日實牙實齒話，百仕達下周一出業績後，就會有搞作。
查實百仕達呢排股價升唔少，噚日又升4％，收78仙，再創一年新高。
經紀陳話，百仕達炒上，坊間主要認為係因旗下百江燃氣（8132）股價勁升，所以水漲船高。呢個固然係其中一個炒上藉口，百江本身亦送出一隻公司輪，唔排除係炒上托住個價日後方便散輪，百仕達亦有炒高需要。
講完一大輪，佢嘅結論係百仕達在下周一前仍係安全期，皆因呢個時候唔可以配股，股價通常守得住。
另外，小初以往講過嘅長城數碼廣播（689），噚日突然急升23％，收16仙，但與早前水位仍差一截。經紀陳話公司剛剛開過股東會，批准可以發行新股嘅一般授權，唔排除又想再印股票要錢。
慕容小初