成日聽人講世界變，但係都估唔到變成咁，以前出街玩玩具，只會俾人笑大唔透，殊不知，今時今日，三十幾歲玩玩具，竟然叫做In，識得去玩具展叫做「型」，男人老狗玩住隻2吋高熊仔，玩小丑竟然係講緊911事件……
無論如何，如今玩玩具不再是小朋友的事。就似明天開始的玩具展，總共有六十多個參展單位，除大家熟識的MichaelLau外，還有其他本地高手雲集。一個膠Figure，一萬幾千閒閒哋。
記者：朱文俊
攝影：林栢鈞、伍慶泉、楊錦文
玩具展兩隊主將
本身同是廣告創作人的鐵人兄弟，William、Winson及Kenny，甫踏足玩具界便製作鐵人兄弟系列，並即時大獲好評。去年一次玩具展，更以拍賣價$30,000，賣出一隻紅色拍賣版auctionbaby。今年鐵人三兄弟亦有新搞作，推出與上次剛陽十足工人Figure相反的小丑系列，據他們所講，創作意念是來自911事件。「自從發生911事件後，成個社會都充滿戾氣同怨氣，人人都感到唔開心，我哋就諗到不如用馬戲團做主題，希望帶到歡笑畀人，小丑最能夠代表歡樂。我哋總共做7個唔同的小丑，每個人都有自己崗位，包括：消防員（BJ.Fire）、廚師（BJ.Bowl）、軍人（BJ.Soldier）、工人（BJ.Hammer）、魔鬼（BJ.Angel）、病人（BJ.Fever）同埋領袖（BJ.Captain），希望透過人與人之間合作，可以重整一個和平世界。」
趕上玩具展的三人組合Eddie、Nelson及Ivan，原來是第一次製作搪膠公仔，他們為玩具展，坦言花了十萬元。Eddie、Nelson兩兄弟在美國長大，同樣喜歡籃球及HipHop文化，回香港認識做設計的Ivan，發覺志趣相投，便合作製作「街球搪膠公仔」。Nelson負責畫草圖，Ivan負責包裝設計，Eddie負責生產，膽粗粗推出250套限量版公仔，每套$1,900。為加強收藏價值，每套公仔都有獨立號碼。所用的搪膠製成工序較特別，據Eddie所講，一般用搪膠方法是油炸，佢哋就採用燒烤，使膠更為柔軟，令Figure動作更靈活。
提到今趟創作意念，他們說：「起初我哋都有諗做Q版NBA公仔，但我哋一向覺得打NBA籃球太過常規化，香港人較多玩街波，奉行Winstay,loseout定律，發展空間較大，所以我哋嘅配件都用咗較誇張表達方法，睇起嚟都靚啲。」
他們一致認為今次玩具展中賣出多少Figure都不是問題，「希望十幾年後，啲人拎起隻公仔會話：『隻公仔嘅顏色幾特別，設計幾正！』咁我哋就滿足。」
今年玩具展已是第三屆，據展覽負責人盧Sir表示，此玩具展目的是推廣玩具文化。香港市場太小，亦希望能夠給玩具設計師展覽自己作品。問及要甚麼資格，他說：「基本上，冇乜所謂，只要有興趣就得，當然翻版玩具就例外。我發覺𠵱家好多設計師，都有太多成名設計師影子，做玩具設計，應該同其他設計一樣，要有自己風格，發掘自己特點最緊要。近年好似Tim嘅公仔，雖然都有其他人的影子，但係就逐漸見到自己風格，另外JetPack大玩60年代迷幻路線，一系列Plastic5公仔同樣幾好幾得意。」
根據盧Sir所講，玩具展平均入場人數大約有8,000人左右，今年更多了單位參加，估計入場人次可衝破一萬大關。
據鐵人兄弟所講，做一個Figure，首先要畫一幅草圖，然後用矽膠做一個「模」（行內叫做乸），再用混合膠倒出一個配件（行內叫做公），經打磨後再做一個「複模」(作用是保存一個完美「模」)，整個Figure所有部分，包括手腳、衫褲鞋襪等都要做「模」，平均一個Figure，隨時有100個以上的「模」。把「模」上色後集齊所有配件進行裝嵌，最後便是做髮型、化妝、服裝及飾物。
Figure愛好者一向分兩派，一派擁護ActionFigure，另一派則心儀搪膠Figure。ActionFigure歷史可溯至1959左右推出的Barbie及1964年左右推出的G.I.Joe。ActionFigure活動關節比較多，公仔本身可以換衫，以現時標準來說，一個Figure最少要有30個以上活動關節，才叫合格；而搪膠Figure多是整個「啤」出，手感較為軟而且空心，可塑性較高，但卻不適合長期支撐整個Figure的重量。
2002plugintoys玩具展
舉行日期：4月19至21日
地點：灣仔華潤大廈低座3樓香港展覽中心
時間：上午11時至晚上7:30
入場費：$20