部長問責制出師有名，攞正牌搵自己友，一圍鵲局，落單起菜，只聽老董話事，擁護一言堂。部長與副部長，埋頭埋腦按本子辦事就包冇撞板。正副部長的柔順程度，好比二合一洗頭水，頭皮、主見，兩樣都拜拜。長此下去，政府無可避免頭大無譜，政局悶到發慌；政情出奇冷感，政治演辭言之無物，像朗誦性無能新詩。政府總部愈是加裝鐵枝，愈似一間陽痿診所。
時局有變，忽然流行頂包。頂包當事人還有fans包庇，吶喊聲援。既然係咁，董家班不妨食住條水，實行部長頂包制，順應潮流，與偶像並進。
部長怎麼頂包法？當然不是搶包山咁頂硬上。頂包人精選如下：
站長頂包。站長駕駛技術有保證，落斜窄路掟彎，就算是死人塌樓，天打雷劈，照樣會定過抬油，最適合在黑色暴雨訊號下，到運輸署頂天文台長包。
探長頂包。探長查大案時，相信不會跟賊佬講「新年快樂」，頂多爆句「留番拜山先講」。探長慎言，最適合做金融管理，大鱷永遠不會知道，自己死在第幾招/槍/銀彈之下。
岳丈頂包。雖然近年每兩對夫婦就有一對會離婚，但岳丈千篇一律，褲袋指揮腦袋，堅持要女婿交出好多個零的禮金，還要有樓揸手，才允許你辦婚事。結果呢，連累很多人破產。不過岳丈未算衰到貼地，橫睇掂睇，仍比首長有為，有冇興趣，頂了首長個位來做五年？