手機鈴聲愈出愈精采，正當大家沉醉於16和弦鈴聲之際，SonyEricsson就決定同大家唱唱反調，新機T68i繼續玩單Tone鈴聲之餘，重要話畀大家知單Tone鈴聲有幾咁好玩，隨你喜歡加震改大細聲，兼且食正MMS及藍芽傳送潮流大氣候。而呢個全新的鈴聲格式你同我都絕對唔可以唔識，佢名字就叫做──iMelody！
記者：劉耀祥、攝影：黃子偉
全新鈴聲格式iMelody（簡稱imy）由SonyEricsson、Alcatel及SIEMENS共同開發的，不過市面上暫時只有SonyEricssonT66及T68i呢兩款手機支援iMelody。而與愛記手機如T68、T39等所沿用的鈴聲格式eMelody（簡稱emy）及Nokia手機所支援的RTTTL格式相比，iMelody可以提供更多鈴聲變化，唔係淨係得高低音咁悶，重可以加震兼配合閃燈邊響邊閃。𠵱家就用T68i作示範，數數iMelody有乜強項！
強項1
若然機頂有閃燈，可配合鈴聲同步閃動，唔使改機都可邊響邊閃。
強項2
可以將個Backlight都校到同鈴聲一齊閃，更可配合機頂燈一齊閃閃吓，而且重可以跟埋節奏閃。
強項3
鈴聲淨係得聲當然唔夠，加埋震就夠晒動感。一般手機會成首歌由頭震到落尾，而iMelody就可以畀你選擇鍾意喺邊個音度加震。
強項4
成首歌咁長，總有一兩段係自己的心頭好，而iMelody就可以設定某一段重複播放，直頭玩到好似DJ捽碟咁！
強項5
所講的大細聲當然唔係平時將鈴聲校大細聲咁簡單，而係每個音的聲量都可以由自己控制，等手機鈴聲都可以有抑揚頓挫！
通訊潮流的熱門話題當然係MMS同藍芽，話明係新格式的iMelody又點會冇佢份？以往想同朋友分享鈴聲多數都係Download或者用紅外線Send，而T68i用家更可以藍芽即時Send畀其他T68i手機，或者經MMS傳送鈴聲。不過現時網絡商及鈴聲下載網站都尚未推出iMelody格式的鈴聲供用家Download，想直接下載就要等等。
雖然現時網絡商未有提供T68i的iMelody供用家下載，不過各位亦唔使驚冇得玩，皆因鈴聲網頁「Ringtone之城」內的Nok2Phone鈴聲轉換軟件，已經可以將MIDI檔轉為T68i的iMelody格式。據自創Nok2Phone鈴聲轉換軟件的杜B表示，現時暫時只有呢個軟件可以做到iMelody格式的鈴聲。而MIDI經轉換後，用家可以經按鍵輸入、紅外線或藍芽將鈴聲傳送至手機內。
同場加料
SonyEricssonT66同T68i一樣可使用iMelody格式的鈴聲，不過原來T66更兼容Nokia的鈴聲下載，對於T66的用家可謂是個好消息，下載鈴聲時有更多選擇。
網址：