傳聞咗好耐話會配股嘅瑩輝集團（1163），終於有所行動，雖然集資淨額只得約3000萬銀咁少，大股東又變相減持，但股價就則先回後升。經紀陳話，皆因貨源落在少數人手上。
瑩輝今次以先舊後新方式配股，每股77仙，由大股東先賣8100萬股舊股，再以相同價格認購4050萬股新股。噚日隻股升咗10％，收98仙。
以瑩輝噚日成交量１億股計，唔計配股上板嗰筆，成交量只有唔夠1900萬股。經紀陳話，當中有一半貨由一個大隻佬坐咗．所以實質只有約4000萬股流出街，以噚日嘅成交量睇，重有人未出到貨，所以股價重有一輪波動。
小初早前收到風，話瑩輝可能配股，都覺得好奇怪，因為公司唔算缺少銀両，兼且年年賺幾多，都派番晒息畀股東。
點知早前出業績只派得２仙息，然後公司就配股，重集資咁少錢，睇落唔多舒服。 慕容小初