王傑與陳文媛（BoBo）前晚到屯門一間別墅，拍攝無綫新劇《血殺》，劇情講述王傑試圖勒死BoBo。
談到霆鋒事件牽涉人物愈來愈多一事，王傑說：「我唔知呀，愈係咁愈怕睇報紙，我都費事講嘢，畀少啲意見。」問王傑是否楊受成要求他封口，他說：「牽涉第三者嘅嘢，我費事講咁多，我咁多是非，就算俾人覺得小器都冇所謂，只係唔想傷害第三者。」
有謂早前英皇雪藏王傑，現在霆鋒出事，公司會否集中注意力在他身上？王傑說：「冇人封殺到我，只有我自己封殺自己，我一向我行我素，唔鍾意有人跟出跟入好似懶大牌咁，我鍾意一個人。」
此外，馮德倫前晚到灣仔ClubING出席王敏德生日派對，被問到有否再探望老友謝霆鋒時，他說：「等佢搵我啦，不過佢心情已經平復咗，其實我上次探佢，都有問佢ICAC啲咖啡好唔好飲，佢重笑，總之大家精神上支持佢。我唔會批評呢件事，但做朋友一定企喺佢嗰邊。」
採訪、攝影：駱華齡