今年的復活節對香港的電影業來說可以稱得上是一個「黑色復活節」。四齣分別投資過千萬的港產片的票房總收入只有千鬆啲萬，成績令業內人士心寒。
市道似乎如此不景氣，但偏偏又有幾齣以女性觀眾為主導的電影成績驕人。《新紮師妹》、《我的野蠻女友》及《我老婆係大佬》分別都有不錯的票房收入，證明了此類片種有一定客路。翻開報章雜誌，只見不同的瘦身纖體公司大灑銀元賣廣告，目的是令女士們相信付鈔便能令脂肪無色無味地消失。此類生意一定是大有作為，否則邊有咁多錢賣廣告？
這一切似是反映了一個社會現象，香港的男士們現在較為手緊，沒有多餘錢亦沒有心機、時間去娛樂，不過亦可能是大部份錢都已花了去北上尋歡。女孩子們則較樂觀，開心與扮靚仍是最重要，只要能夠開心與靚靚，使多少錢無問題。
女性主導消費這概念，大大地影響了電影業開戲的決策，逐漸形成了電影圈的「大陽痿」，男孩子入戲院睇戲要問過女孩子，女孩子唔肯睇就冇得睇，因為男孩子又會覺得如果冇女孩子一齊睇，都唔知入戲院做乜鬼？於是周而復始，萬象不更新，女孩子對睇乜嘢戲操生殺大權。
電影的「大陽痿」會維持幾耐冇人知，不過拜託男士們到啱時機時，就振一振夫綱，揸主意買飛帶女友入場睇男人戲，否則當陽痿成為習慣，到時將神油加偉哥外敷內服都只係得到一條軟皮蛇，永遠地得到《野蠻女友想嫁個有錢人點知撞到新紮師妹一齊去捉大佬老婆》，咁就暈得一陣陣。