美股本周進入業績公布高峯期，上周嘅過山車式走勢料持續，值得注意係美股收市後所公布嘅公司業績及盈利預測，可能對港股影響更直接，千祈唔好單睇美股收市價就買貨或沽貨。
好似前晚咁，杜指收市跌97點，納指亦跌2點，但收市後NovellusSystem發出第2季利好盈利預測，帶動美股期指急彈，因此噚日港股不但冇跟杜指下跌，反而因為賣地成績理想及盈富基金（2800）去貨快咗，恒指回升60點。
恒指昨收10789，短期關鍵阻力50日線10847，恒指STC%K線噚日於超賣區升破%D線，啟示將展開反彈，似乎後市先反彈多過先尋底，不妨留意恒指法興Call輪9045，數據相當合理。
光通數網（155）果然有料到，收2.1仙，急升逾16%，今日若升多一兩個位，不妨先計賺錢數，等調整後再買。公司已建議改名為御泰國際，擺明係旗艦，相信日後會有好多動作跟尾。提起御泰，自然諗起海爾中建（1169），有人話後者近日股價不前，乃因注資一事落空，但有可靠線人同趙飛雲講，注資事在必行，只係尚差多少手尾未搞掂而已，遲啲就會有好消息。 趙飛雲