英國啲傳媒造新聞認真有一手。雖然碧咸受傷單嘢經已過咗成個禮拜，但喺英國傳媒催谷之下，搞到佢繼續成為英國人茶餘飯後八卦嘅話題。
碧咸要唞起碼六個禮拜已係鐵一般嘅事實，但英國啲傳媒依然唔停手捕捉佢嘅一舉一動，之不過喺性質上就有啲唔同，再唔係報道一啲老正嘢，而係啲花邊新聞。
好似有一家報館就話佢哋影到碧咸隻右手多咗個羅馬數字七字（VII），重話碧咸係喺養傷期間新紋上去嘅；另外有家小報重搞笑，居然攞咗碧咸隻腳嘅相畀個睇相婆睇，點知個睇相婆話碧咸腳毛多性慾強，腳趾公大梗係好大使，認真笑爆嘴，呢啲說話，睇慣碧咸新聞嘅人都噏得出啦。不過，英國傳媒能夠將一單球員受傷新聞，搞到咁有娛樂性，真係要寫過服字畀佢哋囉。
好多參加今屆世界盃決賽周嘅歐洲球隊，都話怕日、韓又濕又熱嘅天氣，不過就冇話諗辦法去克服呢個問題。英格蘭前鋒奧雲就唔同，佢為咗喺決賽周時有更好發揮，就會喺利物浦約翰摩爾斯大學嘅一個高科技氣溫控制中心特訓，大學會將中心嘅氣溫同濕度，校到好似日、韓嘅夏天咁，等奧雲練習。奧雲咁認真，的確抵讚！
公鹿嘅美臣恃住自己係隊中資歷最老嘅球員，幾乎每日都炮轟隊友豆腐防守、射籃亂七八糟，成個「大佬」咁款，直情撈埋教練個瓣，唔怪之得連教練卡爾都頂佢唔順，叫佢收聲，專心打好自啲波咁話。咪係，美臣應該知道自己今季的成績比上季差成一大截，好似有口話人冇口話自己喎。
早輪咪講過曼聯領隊費格遜去意大利睇波兼睇辦，結果搞到拉素後衞尼斯達腳仔軟；不過尼斯達做軟腳蟹呢招，似乎無阻「老費」對佢嘅賞識，據英國《太陽報》報道，尼斯達將會喺夏天以三千萬鎊轉會「紅魔鬼」。不過，我求大俠對呢段報道就有啲保留，因為有時英國報章真係吹水到你唔信。
羅馬後衞彭路基今季都算好風光，佢經理人重放晒風聲話皇家馬德里同巴塞隆拿都想簽佢，斷估佢係明知羅馬有心買斷佢，提早跳定草裙舞，希望羅馬畀高薪厚祿佢。彭路基咁做似乎唔係咁要得喎，當日唔係羅馬同教練卡比路打救佢事業，佢都無今日啦。