由台灣嚟香港發展嘅應采兒，前晚大概十一點四十分左右喺蘭桂坊出現，佢頭戴cap帽，一身黑色T恤加牛仔褲，佢話爸爸由台灣嚟香港探佢，所以陪佢同埋啲朋友食飯。
咁啱過百位為內地人士爭取居港權嘅市民遊行經過蘭桂坊，佢哋沿途大聲喧嘩，唔知喺蘭桂坊食緊飯嘅應采兒聽唔聽到呢？
其實應采兒大部分家人都喺美國，佢隻身嚟香港發展，加盟中國星成為力捧新人後，佢最近諗住租間幾百呎嘅屋住，咁有時拍戲辛苦都有個安樂窩休息下。應采兒喺香港朋友唔多，媽咪有時會嚟香港陪下佢。
港台電視部最近拍咗套劇叫《浮生錄影》，其中喺本月二十九號播嘅《希雲在線》單元就搵咗肥媽個仔同新抱客串。嗰個單元講香港嘅少數族裔嘅故事，題材新鮮之餘亦幾清新。
編劇黃浩然話呢班人成日喺街撞口撞面，點解唔寫個古仔關於佢哋，馮仁昭睇過之後覺得個感覺幾舒服，值得一睇。
由亞視舉行嘅《第八屆十大電視廣告頒獎典禮》本周六舉行，噚日大會喺亞視總台開記者會。
首次喺亞視做司儀嘅黃智賢話：「以前喺無綫已經好恨做兒歌金曲頒獎禮主持。之前試過幫無綫做過警訊騷發台瘟，對住警務處長講錯晒啲台詞，真係好尷尬。」
羅慧娟噚日喺中環中藝公司嘅珠寶展客串做模特兒。佢戴咗兩款總值四百幾萬嘅翡翠首飾。
羅慧娟話買唔買得起都係其次，最緊要都係識欣賞。今次個展覽係同仁濟醫院教育服務基金籌款，所以無報酬都值喎。
張艾嘉前日台灣宣傳電影《想飛》時，話後生時，曾經諗過生五個細路組樂隊，雖然佢目前只得一個乖仔奧斯卡。
但係張艾嘉話拍完《想》片之後，同吳彥祖、陳冠希感情好到不得了，直情將佢地當做自己個仔，都算完成咗一半夢想吖。
郭羨妮噚日同唐文龍喺尖沙嘴為《絕世好爸》開工，拍到唐文龍力追郭羨妮，但被女方拒絕，問郭羨妮現實生活有冇遇過癡情漢，佢話：「咁大個女梗係有啦！不過好彩𠵱家冇。如果真係發生，我唔會親口同對方講唔鍾意佢，免得大家都尷尬，我唔主動聯絡佢，久而久之對方都知乜嘢事啦！」