患風濕病行動不便的鄒記老伯，近日遭親人遺棄，無家可歸，面臨三餐不繼。「我已經幾十歲，精神愈嚟愈差，𠵱家重俾屋企人嫌棄，真淒涼！」七十歲的鄒老伯淚盈於睫表示。
記者探訪鄒老伯當日，他幸獲同鄉朋友收留暫住，才不至流落街頭。面容憔悴的他說：「好彩個鄉里畀我夜晚喺佢屋企做廳長，唔使我瞓街。但長期住喺人哋屋企始終唔方便、唔係辦法！」
白髮蒼蒼的鄒老伯，原籍惠東，早年在家鄉與年紀相若的妻子靠務農維生，育有兩名子女。惜妻子於一九七○年因喉癌逝世，遺下鄒記帶着一對當年分別只得十三歲和八歲的兒女，孤苦過活。
由於當年農村耕作失收，加上難以平復喪妻心情，鄒記早年毅然攜一對骨肉來港謀生，多年來一直從事五金廠工人，三父子相依為命。
鄒老伯含辛茹苦養大兩名子女，以為可老有所依，退休後安享晚年。豈料近年常遭兒媳惡言相向，日前更被人趕出家門，生活頓失所依。「呢兩年經濟唔好，個仔做地盤泥工好多時冇工開，已經好耐無畀生活費我；同新抱又夾唔嚟，食飯要坐開一邊食，早兩日搞到我要拎埋啲衫褲同證件走。」鄒伯歎謂，女兒因丈夫嗜賭，帶着三名在學子女生活艱難，一向無力供養鄒伯，現更難以給予他任何接濟。
鄒老伯目前身上只有十多元，面臨三餐不繼。他哽咽着說：「我去咗社會福利署申請綜援金，未有消息，用埋手頭上嗰幾蚊，就連買個麵包食都唔得！」
晚年飽受風濕病折騰的鄒老伯，現缺錢醫病，「我對腳風濕痛得好犀利，加上我有血壓高，試過幾次頭暈跌到對腳更痛。但𠵱家我邊有錢睇醫生，惟有去附近山頭執啲野草濕水敷住對腳，代替食止痛藥，等對腳舒服啲。」他一臉無奈說。
有見鄒記老伯經濟緊絀，蘋果日報慈善基金即時撥款五千元，助他支付政府門診費用及應付短暫生活急需。 捐款編號：C0525
暖流熱線
電話:29908688
傳真:23702192
電郵:
網址：