盈富基金（2800）噚日又賣出1.58億個單位，賣剩2.05億個單位，銷情又有好轉迹象，再賣多兩日應該會清倉，到時可能會刺激班淡友掃貨平倉都唔定，特別係美國5月加息機會已經下降。
瑩輝（1163）大股東沽8100萬股然後認購4050萬股，每股同樣作價0.77元，變相減持4050萬股，套現3118.5萬元。一般而言，大股東減持唔係好事，不過此股噚日先跌後升，收0.98元，升10.1%，與傳統智慧有好大出入。Cookie話，配售代理只係盡力幫大股東配股，毋須包銷上身，所以對股價冇咩壓力，更何況此股一向街貨唔多，要挾上去先散貨其實好易。
光通信（603）股價急升逾10%，噚日見到百記與大摩排隊接貨。阿虎四圍問發生咩事？黑客話，早前光通信講明話傾緊單國內天然氣項目，可能會發新股進行收購，聽講單Deal金額都相當大，光通信可能因此而股權易手都唔定，由於新購嘅資產可能會吸引到外資，所以有唔少大行捧場。
另一方面大家要留意此股將於22日公布業績，公司舊年表現唔慌好，不過亦已經衰到盡，不可能再衰，公布業績後可能會有動作。
沉靜咗一段時間嘅文化傳信（343）噚日出現異動，股價升5%，收0.415元，成交達2518萬元。ｉ師傅話，市傳幕後人士想將股價推高至0.50元，至於炒作理由就真係唔清楚，不過炒股其實一向都唔使搵理由，夠膽就跟啦。不過炒文傳嘅同時，大家唔好忘記佢嗰難兄難弟衝浪平台（8178），此股噚日都升3%，成交有成1417萬元。 阿虎