近年香港經濟環境欠佳，裁員減薪風潮一浪接一浪，的確困擾不少港人，有些人更因經濟困局而自尋短見。其實為錢自殺着實不智，想解決問題，最緊要解開個人心結，發揮個人潛能。除了找家人朋友傾訴外，原來也可選擇參加一些自救課程，幫助自己走出谷底之餘，甚或尋找商機。
記者：朱文俊
攝影：伍慶泉、陳穎
環顧近日發生的慘劇，不少與當事人的經濟環境出現問題有關，這個結合心理學及MBA(商業管理碩士)的「心理學MBA」，便有助學員衝破心理關口，發揮做生意潛能。此課程由心理學博士顧修全主持，他主張理論與實踐並重，包括堂上用錢做生意，以及學功夫劈磚。
顧博士表示：「我覺得𠵱家香港人輸嘅係心態，今日驚輸畀深圳，聽日驚輸畀上海，但我哋無諗到，其實我哋依然好掂，淨係拎個中環出去，就已經冇乜地方夠香港玩。香港人近年成日講增值，但大部分人所用方法有偏差，就咁讀一個Course，就算係MBA都無用，因為讀完之後，亦冇得用番出嚟，冇人擔保你會發達，係咪？所以我搞呢個課程，教人點樣活用MBA理論，點樣提升自己能力。」
課程着重技巧、動力及策略，顧修全續稱：「學員第一日入營會被分成若干組，當成不同公司。每日都有一個做生意模擬比賽，每個學生一人拎一百元出來，大家運用每日學到的知識，與其他公司比賽，贏出公司可獨得獎金，透過呢個訓練，令學員更深入了解技巧運用，因每個學員每日都贏緊或者輸緊錢。
「除照顧心理，課程重會照顧埋生理，學員每日接受跆拳道訓練，如劈木板、甚至劈磚，講給學員聽，做呢件事有一定危險，等於做生意會有一定風險，做唔做由佢自己衡量，但係大部分學員，就算係女仔，上完呢個課程都可以一掌劈開塊磚。」
心理學MBA
收費：$16,800
開班日期：2002年6月14至18日；7月27及28日；8月25日
八日七夜課程包括：
～MBA課程筆記
～自己編制「企劃書」及「市場推廣書」
～不同商業智能測驗
～教導學員用催眠方法改變自己
～專人教授跆拳道及田徑運動
～供應所有膳食，在父親節期間安排燒烤
上課地點：烏溪沙青年新村
查詢電話：25042733
「讀完書就做記者，有人叫我去做公關，我又走去試吓，後來同老闆意見不合，公司登報同我劃清界線，當時覺得好大件事。後來上咗堂，學到好多做生意技巧外，最大得益係認識自己不足，同得到好大Database（資料庫），因同學來自不同層面，對日後發展得益好大，首年利潤已有三百萬元，總算同自己有個交代。我重學咗『膽識』，全世界話個市靜，我唔信，九九年去上海開拓大陸市場，我唔喺香港，生意係少咗，但我喺上面寫咗三本關於上海營商嘅書，後來有唔少公司搵我做上海投資顧問，最後就知我係賺咗。」
「我以前做健康產品管理，公司大約有二十人，但十九個人都同我唔妥，我做事出嚟結果係啱都無人服，重有意無意阻撓我，當時點諗都唔明，上咗堂至發覺原來自己所用嘅方法幾令人討厭，後來我改變同人溝通方法，再轉工賣電腦，不久發覺有能力發圍，就開間專賣CPU公司，第一年純利已超過二百萬。我之前完全未做過電腦生意，我能夠成功係我學識利用關係，明白點樣將阻力變做助力。坦白講，好似我以前咁嘅脾氣，得罪人多稱呼人少，點會有生意？」
除一般打工仔面對失業問題外，許多高薪一族專業人士，亦備受減薪裁員威脅，如何理財去度過失業難關，或安排日後退休生活，驟成重要課題。一間在國內及本港均有辦事處的控股公司，便請從事體驗式訓練的Josephine，替員工進行一個管理財務訓練。
Josephine所使用教材是來自暢銷理財書籍《富爸爸、窮爸爸》的「CashFlow」遊戲。參加者二人一組，各自用不犯規方法，最快買下自己夢想為之贏。比賽過程是一個商業活動的縮影，參加者需計算自己資產，再根據能力儲到一定金額，走出老鼠籠，再回到自己夢想格子，買下夢想便勝出。每次均以所擲骰子點數作為前進步伐，遊戲方法與「大富翁」有點相似。
過程中，每個人都全力以赴，甚至有人為了不想其他人贏出，寧願犧牲自己，一拍兩散，被阻礙者亦不會發怒而沉着應戰，最後大家都明白，如果不合作，根本不可能有人贏出，大家才開始互相融資，令其中一個走出老鼠籠，再回頭幫其他參加者，整個遊戲方能完結。
管理財務訓練
收費：每學員每小時$100
課程內容：CashFlow等遊戲，或可度身訂做遊戲內容
查詢電話：26911511（只接受個別團體申請）
該控股公司行政總裁Terence表示：「我哋公司一直都注重員工培訓，之前亦都參加過其他課程，覺得今次遊戲，可以令我用另一個角度去睇自己理財方法，覺得有借鏡地方。」
同場參與遊戲的上市公司主席Edwin，覺得遊戲非常切合實際商業社會，「在整個過程裏面，冇人話你知你呢個決定係啱定錯，全部都係你自己去決定，後果亦都係自己承受，好真實。」
不少宗教團體、非牟利機構或個別團體均有舉辦一些平價自救課程，例如從事心靈學研究的專業導師Betty，推出「心誠信實」減壓課程，旨在強化人與人之間聯繫及發展心靈智商。
心誠信實
收費：$80（會員）；$100（非會員）；$60（學生）
日期：4月22日
課程內容：互動遊戲包括活力愛心圈、跳出新天地、紓緩空間大傾訴等
地點：中環致發大廈 查詢電話：25736198