不知不覺，恒生指數成分股都公布晒業績，翻一翻佢哋嘅年報，八方發覺福布斯最近將中國移動評為全球四百家最佳公司之一，原來真係有啲理由，事關呢間不但係賺錢最多嘅紅籌公司，董事收酬金亦相當克己。
中移動董事長兼首席執行官王曉初舊年嘅董事酬金，非但拍馬都追唔上香港打工皇帝──和黃董事總經理霍建寧，原來連競爭對手──中國聯通董事長兼首席執行官楊賢足都不如，差幅幾近一半之多！
中移動去年賺二百八十億人民幣，升五成五，但十二個董事嘅酬金只增加百分之十六，只有一千四百萬元，最貴兩名董事（估計係王曉初同埋副董事長兼營運總監李振群）酬金亦只係二百萬至三百萬元間。
反觀去年賺多咗三成幾、賺四十四億元嘅聯通，十一個董事嘅總酬金卻達到二千一百六十萬元，增咗近六倍，最貴嗰位（應該係董事長楊賢足啩），年薪達到五百萬元以上，足足高對手一倍。
E-mail：