報道話經濟不景氣下，高消費銷售不跌反升。袁人祥一早已反映此情況，佢賣嘅係裏原宿名牌，對象係有錢仔，成千蚊一件衫仔，銷路從無受過影響，皆因富者愈富。反而百零蚊件自己出品，就算靚Print交足工夫，銷情就麻麻，因為顧客對象係草根，證明貧者愈貧。
所以做生意都係做有錢佬最着數，做大眾階層艱苦經營有排捱。袁人祥提起五支火柴頭名表，無論窮人或富人都要隻引以為榮，無論乜嘢環境都唔愁冇人買，尤其隻369經常被人炒價賣。不過佢就有計以原價買。
袁人祥話去正牌代理店，求啲Sales仔賣隻369畀佢，就算炒價都照要，不過謹記叫佢開單，重要寫明價錢，當然係寫番個炒價喇。第二日袁人祥就攞張單上代理嘈，問點解正牌店都可以超公價賣表？代理自然嘈番舖頭，舖頭為求息事寧人，最後要退番錢畀客人。如果唔係，被代理Cut戶口就大鑊。不過遇上唔退錢嘅話，個客都無符，大食Jack聽後認為博唔過。
主持人：大食Jack
八卦熱報：