兒童天地：
肥皂泡玩具設計大革新

春天一到，又係出外遊玩的季節，草原奔跑花叢撲蝶當然都唔及吹肥皂泡好玩有新意，今次就為各位家長及小朋友介紹一啲新款嘅肥皂泡玩具。佢哋嘅造型非常得意搶眼，扮乜似乜，再加埋玩法亦愈來愈多元化，小朋友必定玩到停唔到口。
記者：許穗齡
攝影：陳偉強
ImageGirl：欣欣

過癮之作：扮鴨嘴最搞笑
小時候吹肥皂泡，肥皂泡棒一定係一支圓圈棒，無乜新意！今時今日就唔同晒，連外形都講求設計包裝。好似呢款就以扁嘴鴨為造型，設計反傳統。橙色膠製嘅鴨嘴，可以吹出一個個肥皂泡，變成一隻吹泡泡的鴨仔。每套連小膠盆及泡泡液一樽，得意好玩。
尺寸：長9cm、闊10cm
售價：$40（Loft）

伸縮棒啱男孩們
男孩子們對一些類似劍狀的物體始終情有獨鍾，呢款肥皂泡伸縮棒就啱晒佢哋玩。膠製伸縮棒連一樽泡泡液，只要將膠棒浸入泡泡液內，然後㩒手柄上的黃色按鈕，便可令伸縮棒伸長，就可以吹出一排四行的肥皂泡啦！
尺寸：長13cm
售價：$29.9（玩具反斗城）

無酒精香檳泡泡
未成年嘅小朋友當然唔應該接觸酒精類飲品，不過呢支以香檳作造型嘅肥皂泡玩具，就絕對適合小朋友玩。撕去樽頂的錫紙，再扭開樽蓋，就會發現肥皂泡棒，而成支半透明膠製嘅酒樽造型非常搞鬼，用嚟喺生日派對齊齊玩就最開心不過。
尺寸：高28cm
售價：$40（Loft）

吹泡泡小昆蟲
春天百花盛放會吸引到小昆蟲出沒，得意嘅小昆蟲今趟出動幫手製造肥皂泡。膠製小昆蟲造型可愛，連一樽泡泡液，前方的泡泡圈更是呈心型狀，非常切合其造型，吹泡泡時更會吹動小昆蟲頸上如風扇般的頸圈，夠晒過癮。
尺寸：長12cm、闊7cm
售價：$29.9（玩具反斗城）

幾可亂真假香蕉
香蕉健康有益小朋友未必知道，不過原來佢可以成為吹肥皂泡嘅好拍檔，好似呢款無論外形同尺寸都同真香蕉無異嘅肥皂泡玩具，就必定令小朋友愛不釋手。膠製香蕉細看之下，蕉皮更有啡色一點點作裝飾，令佢更似真香蕉，雖然唔包泡泡液，不過尾部則附有黃色小盆一個，方便盛放泡泡液。
尺寸：長24cm
售價：$25（Loft）

美味雪糕筒
小朋友鍾意吃甜嘅食物，見到雪糕更停不了口，相信呢個以雪糕筒為造形嘅肥皂泡玩具，會得小朋友嘅歡心。膠製雪糕筒嘅設計好啱手形，揭開雪糕頭的膠製假糖漿，就係肥皂泡棒，重有啡色朱古力同紅色士多啤梨選擇，兩款都一樣咁可愛。
尺寸：高17cm
售價：每個$30（Loft）

好玩推介：有得吹兼考眼界
水槍同肥皂泡，玩法同樣都是以水為主，但原來兩樣加埋一齊後重可以加添一種玩法，好似呢支膠水槍的設計，就係畀小朋友吹出肥皂泡後，再用手上的水槍射穿泡泡，兩個人一齊玩重可以鬥射對方吹出的肥皂泡㖭！水槍裝備都幾齊備，連主槍加埋可以固定喺槍尾上的吹泡棒，重有泡泡液一樽。
尺寸：長18cm、高11cm
售價：$17.9（玩具反斗城）

益智泡泡學套裝
咪以為玩肥皂泡係小朋友嘅玩意，原來細心研究都有一番學問。呢一套用品就係專門解構泡泡學嘅原理，例如梘液與水的化學作用及點樣製造出不同形狀的肥皂泡，唔明嘅話可以細閱內附嘅小冊子，邊玩邊學，夠晒益智。
尺寸：配件約長3cm至25cm
售價：$200（Loft）

店舖資料
玩具反斗城（28811728）
銅鑼灣皇室堡3樓全層

Loft（29713834）
金鐘太古廣場西武一樓