董特首今日到立法會解釋高官問責制，唔知有冇新料呢？回歸後，大家想知道政府內部堅料，最好睇《文匯報》，人哋一早出一條標題：「梁愛詩鐵定連任」，你估嘢小呀，「鐵定」噃，所有做過報紙嘅老友記都知，「鐵定」呢兩個字唔可以亂用。除非得到當事人、當事人嘅老闆親口講實啦！高官問責呢件大事，唔睇《文匯報》唔得。
酒會中碰到老曹。佢講中三T嘅慘情，笑到左丁山碌地（買中AT&T、Nortel及前HKT嘅股票也），佢寫人哋「重作馮婦」，搞到人哋吹鬚碌眼；佢飲咗兩杯，轉述一個「三娘教子」嘅故事，聽到我哋耳都側，聽真啲，原來係「三梁教子」，子唔係兒子咁解，而係董夫子，三梁乃係梁錦松、梁愛詩、梁振英喎。
董夫子競選連任之時，由於篤定連任，競選辦開咗個頭之後，冇乜嘢好做，聽講非常清閒，大公關下午四點鐘就可以有時間睇吓電視台卡通片，啲事情自有博雅公關、Occassions嘅人員打點，好不輕鬆。如果唔係，啲競選經費點可以報銷咁多呢。到咗第三屆特首競選，啲競選人嘅公關人員相信冇咁有福矣，一定做到氣咳。
今時今日，唔做問責高官（部長），肯定唔會氣咳。鄭大國手似乎冇乜傳聞要做部長，唔知係唔係佢想有多啲時間去夏威夷會佳人呢？佢做CPU阿頭之時，一有空檔就飛去夏威夷，唔知幾happy，做部長邊有咁過癮呀！