我肥媽食過唔少蘋果，當中包括棗紅色蛇果、粉紅色富士蘋果、青色青蘋果等，呢款金黃色金蘋果重係我首次嘗試，食落又幾好味，唔知係唔係同佢金黃色嘅果皮有關，有種獨特嘅清香味道，係一般蘋果無嘅㖭！
試過包保大家都會鍾意，其質感爽而帶粉粉哋，酸甜夾雜嘅食味誘發食慾。金黃蘋果嚟自美國華盛頓，暫時只可以喺大型超市搵到，兩個零一個，價錢都算大眾化。
天氣悶熱，胃口都特別差，最適宜食一啲清淡菜式，蒸魚係唔錯嘅選擇。所以一定要推介黃腳鱲呢種味道清鮮嘅魚畀大家。
黃腳鱲喺呢個時間算係當造嘅魚，不過體積未算最大，約五、六両重，而我肥師奶認為呢種Size嘅肉質最好食，嫩滑但又有肉食，太大條反而會嚡。加上𠵱家價錢都維持喺三十蚊一斤左右，比最貴時平咗成十蚊㗎，抵食。
文：肥師奶