小初噚日同經紀黃吹水，佢話今個星期會上船玩。初時小初重以為佢上賭船博一鋪，點知佢話唔係，係去麗星郵輪（678）做公司探訪。佢話有間星資證券行幫間公司搞呢次活動，睇怕都係想配股居多。
其實，麗星當初以介紹形式上市，完全冇咩街貨，所以上市初段真係要升幾多就升幾多，收尾公司因為銀團貸款問題，一度插到落去2.20元，但近月來一切搞掂哂，股價就掃返上3元樓上，重見經紀黃講嗰間星資證券行維持秩序，令到隻股好似有番成交。
小初覺得，由於麗星街貨實在唔係多，如果真係配股，除非由少數芬佬大手接晒，否則一旦派出街將會幾頭痕，所以經紀黃話，都係上船睇清睇楚至算。
另外，冷門股力普（336）噚日乾升31.6％，脫離仙界重登0.10元。經紀陳話隻股有賣殼傳聞，因大股東去年從盧博士買隻殼之後，咩都未做過。
慕容小初