世界盃下月底開鑼，球迷四出撲飛，希望有機會入場，為心愛球隊打氣，感受一下現場氣氛，當大多數人正忙於撲飛時，江國榮已於兩年多前開始撲飛行動，現擁有千二張世界盃波飛在手，九成為一級門票。已有多年搞睇波團經驗的江國榮，今次好像盡地一鋪，當人人投以羨慕目光的同時，這個如意算盤究竟是否打得響？是禍是福，還是未知之數呢！
記者：馮淑玲 攝影：陳盛臣、伍慶泉（部分圖片由被訪者提供）
鳴謝：環宇足球遊（電話：27174281）
個人小檔案
姓名：江國榮
年齡：53歲
家庭狀況：已婚，兩子
學歷：中學畢業
職業：環宇足球遊董事總經理
經歷：
68-90年
曾在多間報館工作，由記者、編輯升至總編輯。
90年
開設環宇足球遊及雷朋公關顧問有限公司
曾協辦大型賽事：總督盃足球賽、健牌國際滑浪風帆賽（香港）、健牌國際桌球賽（北京、香港）、健牌網球賽、第3屆555港京拉力賽等。
兩年出門百次
江國榮邊做訪問，邊飲「力保健」，話太累，要增強體力。「每晚都十一點幾才回家，連陪囝囝玩的時間都冇。」他的時間全花來搞世界盃睇波團。
江國榮九四年開始搞世界盃睇波團，今年已是第三次，雖說是「搞團老手」，但亦不敢怠慢，上屆世界盃完畢後，便立即開始籌備，近兩年更四出撲飛。
「有時不能只靠傳真、電話和電郵溝通，要親身去到外面，同當地的足總足協及主辦機構傾，這兩年出門都近百次，單係日本、韓國，都去過近二十次，國內更是一星期一次，坐十幾個鐘飛機是平常事，最短都四、五個鐘。屋企人都無幾可見到，試過今日返屋企，過一晚夜，第二日起身又要飛。」
朋友幸運星
撲飛未算慘，撲到被別人拿走，才認真頭痛。有次有機構本答應給他十張飛，但因某國總統話要三張，結果把他的扣起。「他們都無辦法，但造成我們的損失，好慘，本來長城就快起好，卻少了三塊磚頭，又要四圍去搵，好彩都畀我搵到。」
今年世界盃的波飛特別緊張，因國際足協減少七成配額飛，全用作電腦上網抽籤，但江國榮仍可找到千二張波飛，九成為一級門票，堪稱香港「波飛大王」。
「這同個人網絡有關，我做過體育記者，又幫過香港足總主席余錦基做助理，認識不少球圈中人及國際足球組織人士，亦曾搞過唔少睇波團，故經驗豐富。喺朋友間我係幸運星，因為好多時佢哋喺外面攞唔到波飛，都要搵我攞。」
賭王安仔亦捧場
名人歌星藝員更是他的常客，今次世界盃，「賭王」何鴻燊和許志安都要找他辦團。「何鴻燊會坐私人飛機去睇決賽，但行程、酒店由我哋安排。許志安亦搞咗一團，請佢哥哥、吳國敬幾個沙煲兄弟去，佢近排去泰國做嘢，亦頻頻打電話畀我，傾行程住宿，好認真，為咗呢個團同我開咗幾次通宵會，有次俾雜誌影咗張相話佢去偷食，其實係同我哋開會。
「其實，睇波團係球迷夢寐以求，可以近距離接觸球星，同佢哋傾偈影相攞簽名，重可以參觀球會，入佢哋嘅獎盃房，攞住個獎盃來影相。」
波牛的夢
睇波團不止是球迷的夢，亦是江國榮的夢。「我好開心，做到這份工作，我好細個開始睇波，興趣亦係踢波，到現在工作又圍繞足球，已經算好幸運，好多人都不能學以致用。」
江國榮天生是波牛，小時候經常與朋友到球場踢波，曾參加足球明星開辦的足球訓練班，更成日撲飛睇波，當然他亦試過空手而回。「嗰陣時喺花墟球場睇波，買唔到飛，到附近三、四層高的舊樓睇，但樓梯有人守住，畀錢至可以上天台睇，有次睇波嘅人太多，俾差人趕，無得睇，於是又爬山又爬樹睇。」
他說睇波辛苦，但氣氛較現在好，「有八萬人喺球場，同只得八百人的，差別好大，成個場嘅叫聲，叫到個地都震。」
現時本港足球賽沒以往的震撼，故江國榮經常到外地睇波，一年都有近十次。「中國打世界盃亞洲十強賽，對阿曼嗰場，我就特別飛去瀋陽睇，搵上面足協攞飛，雖然明知唔好睇，但場波有歷史性意義，自己想感受一下現場氣氛，嗰陣時影咗張相，我拎住面國旗，身後放緊煙花，好震撼㗎，香港就冇呢種Feel。」
「波飛大王」出外睇波，並非次次都成功攞到飛，九六年去睇歐洲國家盃，就攞不到，要買黃牛飛，但最後都是看不成。「原來嗰張飛係偷番嚟，工作人員重將我趕出場；但我為咗睇波，周圍搵酒吧，點知擠滿晒人，最後搵到間餐廳睇埋下半場，嗰次真係好鬼激氣，居然被人騙。」
江國榮由睇波到收集足球紀念品，家中一間約二百呎的房間，便放滿球衫、足球、球會領帶及各式各樣的球會或球賽紀念品。「以前做記者，唔會鍾意呢啲嘢，但自己開咗公司後，就開始有興趣買嘢，波衫都成千件，運動衫就幾十套，至於紀念品數目，有計唔到咁多，每次出完國，返屋企都一箱二箱，老婆次次都詐晒型，冇計，興趣嚟。」
有其父必有其子，他甚至影響兩歲半的囝囝，看到電視播足球賽，就會說：「世界盃，Daddy喺裏面。」他還喜歡踢足球，是左腳。「我自己鍾意睇波，他亦鍾意，我睇波時佢會伏喺我身邊，一齊睇，佢有時在花園踢波，掟角球都幾準㗎。」
睇波睇多了，江國榮卻沒有賭波，因他曾試過輸錢。「幾十年前，同家人朋友去澳門玩，在葡京旁邊嘅樂宮酒樓食晚飯，我偷偷走去葡京，打算買大細碰運氣，贏番啲飯錢，點知連續開十三鋪大，最後一鋪重要係三個六點，結果帶咗六、七千蚊入去，輸剩千幾蚊，當時擺一圍酒席也只需三百蚊，已經好豐富，有鮑翅食。回到酒樓，自己唔敢吭聲，怕俾人知。自此亦唔敢再賭，寧願將賭波嘅錢用嚟睇足球同買紀念品。」
江國榮小時候曾希望當職業足球員，但機緣巧合，在朋友介紹下，當上體育記者，現在則搞體育活動，他感慨地說：「足球員生涯短暫，只有幾年或十幾年，但我現在喺圈內三十多年，較佢哋襟玩，算係無入錯行。」
買飛小貼士
今年睇世界盃，拿着二級門票可能都要坐山頂。江國榮說：「今年世界盃嘅一級飛（約US$750）由佔三成增加到五成，二級飛（約US$500）變兩成，其餘為三級飛（約US$250）。但我哋發現有啲球場，二級飛都可能在角球旗後（即球場四個角位後的位置），以前呢啲係三級飛，所以今年拿着二級飛嘅都未必係咁正。重有留意個球場係唔係專業足球場，即有冇跑道圍住個場，若果有，咁啲位距離個球場又再遠啲。」