賣地成績不俗，西九龍地皮更以16.4億元成交，高於市場預期。不過，可惜投得地皮係信置（083）而唔係恒地（012），亦唔係新地（016），反映大發展商對後市仍持審慎態度，所以芬佬會否因今次賣地成績再次睇好樓市，就真係難講。
賣完西九龍地之後，大戶又再壓住滙豐（005），似乎想質低大市吸納盈富基金（2800）。噚日盈富只售出1200萬個單位，重有3.63億個單位未賣，價值近40億元，以現時港股每日成交50至60億元計，其實都幾難消化。
市場現時唔係冇錢，只係芬佬認為現水平唔值得大手掃貨，當恒指跌破10000點而基本因素冇大變，就可能有芬佬將盈富一Q清袋。
京華自動化（493）以1.95億元購入北京地產項目，其中可能有1.537億元以可換股票據支付，票據持有人韓月軍可行使換股權持有27.9％，行使價為每股0.12元，較停牌前收市價大幅折讓70％，當然係人都會行使認購權啦。有人話今次只係京華自動化賣殼首部曲，日後可能重有一連串動作都唔定。此股噚日收0.42元，升5％。
明珠興業（988）急升27.58％，收0.037元。即刻有人問阿虎明珠係咪想供股，但阿虎都唔太清楚，不過明珠就快股本重組兼改名為新銀集團，發行新股抽水機會十分大。至於會唔會因為正式改名而勁炒一番？黑客話一啲都唔出奇。
阿 虎