今個財政年度首次賣地有個好開始，無論氣氛及成交價均十分理想，美中不足係最大嗰幅西九龍地皮，成交價雖較底價高出近5成，可惜買家係大好友信置（083），佢專買貴地嘅形象深入民心，令樓市向好嘅說服力要打個折扣。
佑威（627）上周五撈底撈得靚，噚日再升2.8%，收0.72元。近兩日升勢頗急，可能需要稍作整固才再試0.76元重大阻力位，短期如守穩10日線0.71元，後市可看高一線，暫以0.69元作止賺位持有，確認升破0.76元伺機加注。
上周提過嘅光通數網（155）噚日除權，股價都企得幾穩陣，趙飛雲喺1.8仙買咗1球貨。據講公司稍後陸續有動作，會由同系公司注入金融證券業務，側聞並會為內地一間大型民企嘅香港上市公司做財務顧問。此外，日後亦可能注入大老闆嘅生化、科技業務，可以憧憬。光通數網噚日收1.8仙，跌0.1仙，值得注意係每個價位變動達5%，呢類價位嘅股票相當難炒，升兩個價當然冇所謂，但跌兩個價則唔見超過10%，風險相當大，故此散戶玩呢類股份，記住注碼要細，並嚴守止蝕位。
趙飛雲