上禮拜五晚紐約油價急跌，但3大石油股昨日並冇回落，其中中石化（386）升得最多，收1.39元，有3%進帳，理由係油價下跌，有利石化類生意。
中石化個勢重有得去，不過要炒中石化Call輪冇乜得點揀，得隻9062。9062收34.5仙，升7.8%，明年1月到期，溢價負6.5%，槓桿率4倍。
負溢價係因為正股派8分人民幣末期息，相等於股價5.4%。計埋除息因素，9062都重係負溢價1.1%，照計冇理由咁快實際負溢價。
9062冇乜成交，昨日得1.3球易手，可能因為買賣唔易，啲炒家冇乜耐性做買賣。
中石化其他Call輪9098同9227，一係冇成交，一係實際溢價高多啲，值博率比唔上9062。
中旅（308）先幾日派成績表後散落嚟，昨收1.60元，升番4仙。
中旅公司輪763只升半仙，收44仙。明年中到期，溢價3.8%，槓桿率3.6倍，有得諗。有隻消費籃子輪9256，成分有中旅，但啲數據唔得，冇得諗。
章 盛