西九龍樓盤大混戰，對區外樓盤未構成影響，屯門翠濤居一路都有單位成交。
美聯余永泰話，其中一宗成交嘅買家是一對比利時母女，佢哋來港旅遊逛街時，被美聯經紀游說睇樓，再實地睇現樓環境，再與另兩個樓盤比較後，決定以近300萬買咗翠濤居一個900幾方呎的A室。
另外一單是一對美籍夫婦，亦以近300萬購入一個900幾方呎A室。
內地樓市響本港房地產市場開始佔一定嘅比重，來港展銷嘅內地樓盤愈來愈多，而報章亦逐漸見到有內地二手盤嘅廣告，當中自然有本港地產代理行中國部刊登嘅廣告，較特別係連內地拍賣行都響本港報章登廣告。
由天廚集團持有嘅灣仔上海實業大廈翻新完畢，現委託代理招租，呎租10蚊起，單位面積1326至5500方呎，單位附全新天花同燈盤等。𠲖家業主做緊推廣，不過有幾多優惠，就要問中原地產。
蘭西