朗拿度響禮拜日對布雷西亞三分鐘內入兩球，幫國米起死回生，全世界傳媒即刻將佢捧上天，話佢打救國米。咪睇哨牙仔平時十吓十吓，其實佢不知幾醒目，點會錯過呢次機會，實行寸番傳媒？
相信大家都記得早前朗拿度番巴西養傷，傳媒一味報道佢參加里約熱內盧嘉年華同埋蒲夜店嘅消息，搞到哨牙仔一肚火。佢呢次入完兩球靚波後，即刻寸番傳媒，話佢狀態回勇，根本就係靠響巴西努力練習，而呢個事實係大家都忽略咗咁話喎。哨牙仔都霉得耐囉，今次出番啖氣都係人之常情啫。
鍾意睇烏龍波嘅朋友，響禮拜日肯定過足癮囉。事關意大利波同埋米字國足總盃合共三場波，比數都係一比○之餘，重要係全部都算係靠烏龍波分勝負，其中米杜士堡費士達、AC米蘭查莫特入嗰兩球都幾靚，我求大俠建議兩位仁兄不如考慮改踢前鋒啦。
全世界都講緊英格蘭國家隊唔夠中堅用，查實現兜兜有個泰利啱使。呢位車路士中堅響禮拜日足總盃對富咸時踢到識飛咁滯。雖然佢包住個頭，但包抄準、所有波頂晒，重要入埋波㖭，擺明向唔選佢入國家隊嘅艾歷臣示威。講到尾，如果佢同列斯中堅活基治唔係衰行為差唔俾入選，英軍又點會鬧中堅荒？
國際米蘭玻璃人韋利又受傷唔係新聞，但佢成日響國家隊比賽之前受傷，難免又惹人講閒話。佢傷勢重唔重，同埋係咪想留力幫國際米蘭爭標，只有佢自己知，但係佢上次無踢對英格蘭場波，已經搞到幾乎同羅馬會長罵戰咁滯，如果佢周中真係唔踢對烏拉圭場波，睇怕又有古講嘞。
噚日我求大俠先啱啱講完中國前鋒謝暉俾德國乙組亞琛棄用，估唔到事隔一日又有佢嘅新消息──中國隊集訓名單無佢份。我求大俠真係唔知佢有咩好忙囉。唉，佢早排咪同黎明一齊幫收費台拍世界盃特輯嘅，不如趁得閒向黎明偷吓師，考慮吓進軍娛樂圈啦。
羅馬前鋒巴迪高上季威到盡，今季就真係衰到貼地。撇開佢走下坡，同埋老友巴布又啱啱離開羅馬唔講，佢自己今季成日受傷，禮拜日又無端端受咗簡拿華路一腳，下唇聯咗八針。唔止咁，重唔可以代表阿根廷踢周中對德國場友賽，隨時因為無機會證明自己狀態，入選唔到世界盃大軍都唔出奇，真黑仔！