賓架P請靚女到銀行家俱樂部(BankersClub)食午飯,左丁山受召奉陪。一上到去,見到好多熟人,律師M亦佔一枱。呢個會以前只限銀行家參加,現在會籍放寬咗,與金融界有聯繫嘅行業亦可加入。律師M專做銀行融資、上市、收購合併等業務,可能因為咁,亦都入會。呢個會所啲食物係大路貨,不過不失,勝在喺告羅士打頂樓,夠晒方便。
賓架P講咗好多嘢,不過聲明唔准寫;靚女W亦有料爆,知道小女個女朋友喺邊間銀行做,賓架P連忙喝住,又話唔准寫。唉,食餐飯,禁條多多,睇怕啲人以後要左丁山停寫專欄都似。
食完飯去中建大廈睇醫生,喺HMV門口條樓梯碰到投資V。佢對住左丁山呻,話佢哋啲對沖基金業最近俾稅務局查數追稅,做多好多嘢。皆因人窮思舊債,政府窮就想追舊帳,啲對沖基金(屬非認可基金non-authorizedfunds,唔向公眾報銷嘅)一向當係一般基金,但𠵱家稅局要追討佢哋嘅tradingprofit(即係日常買賣股票嘅利潤,今日買十號仔,聽日賣出,賺到嘅就係tradingprofit)稅款,成個行業都媽媽聲。投資V話梁錦松一邊話要發展金融業,稅務局就喺另一邊窮追,趁新加坡大幅減稅之便,啲對沖基金轉移陣地都似!稅局又唔淨止追對沖基金,一位「五大」嘅稅務專家講過,好多中小企業都被翻查舊帳,一啲出名人物亦慘被開刀㖭。