淘大除咗醬油之外，又出點心又出方便粥，最近更推出叮叮粉麵，真係好方便忙碌嘅都市人。
除咗方便上班一族之外，對於我哋呢類主婦都係一大貢獻嚟㗎！有時啲仔女、老公去完運動，返嚟大叫肚餓，可以四分鐘之內為佢哋醫肚。
淘大叮叮粉麵有三款口味，乾炒牛河、星洲炒米，同埋肉絲炒麵，只要將叮叮粉麵放入微波爐，叮佢三至四分鐘，即刻就可以享受到一碟香噴噴嘅粉麵嘞。每包一人分量，小朋友兩人一包都好夠飽。
乾炒牛河$12.9(265克)
星洲炒米$12.9(255克)
肉絲炒麵$12.9(265克)
各大超市有售
我肥師奶平時都好鍾意食新鮮腰芒，佢又香又甜，食味正，但售價一啲都唔平，一磅閒閒哋十零蚊。呢款同樣係腰芒，但經鹽醃製過後就抵食好多，佢係鹹腰芒，嚟自中國，果皮青綠色，食味酸酸甜甜又略帶鹹鹹哋，試過後又發覺幾好味，無乜胃口食佢係最佳選擇，佢除咗比新鮮腰芒襟擺之外(一包有十零粒)，重係無核嘅㖭，啖啖肉帶爽脆，連皮一齊食都無問題㗎！
$6包
部分果檔有售
我肥師奶屋企，常備多種醬料，以備不時之需，家樂牌鮮露當然唔少得，最適合用嚟蘸點炸物、小食等，最近更有幾款新口味，分別係青檸鮮露、辣椒鮮露，同埋蒜香鮮露。青檸味清香，辣椒味開胃，蒜香味則惹味。呢兩日喺吉之島做緊推廣，以特價發售㖭。
吉之島
原價$12.8/樽
特價$10.4/樽
百佳
$12.8/樽
一般嘅蝦，煮熟咗先至會全個外殼變成紅色，但紅袍蝦生嘅時候都係紅色㗎。
紅袍蝦喺春末夏初時份開始當造，所以最近到魚檔都會見到呢種紅卜卜嘅蝦。
紅袍蝦肉質稍為腍身，但味道算鮮甜，而且價錢非常平，一斤只賣二十蚊左右，買返去白灼或者拆蝦仁都好吖。
約$20/斤
各大魚檔有售