走入山旮旯大牌檔有乜好食呀？一陣蕩失路點算喎？請聽我講幾句先，這檔屯門北食肆自94年12月14日開張至今，無賣過廣告，無報紙雜誌採訪過，但晚晚人山人海；煮食班底全是煮齡超過30年的大廚，主攻大路菜式之餘，更拿手玩獨家菜；好多食客是山長水遠揸車入嚟幫襯，店方透露在高峯期，連車位都開埋枱，全場擠滿四百人；愈講愈厲害！今日就等記者代大家花45分鐘，從九龍坐車入屯門北，試探虛實。
記者：楊一凡 攝影：林栢鈞
豬骨仔是豬的小腿骨，它雖然沒有油潤的骨髓，但勝在多筋，夠爽口，煲出來的湯水較奶白色的豬骨濃湯清甜。煲湯前先替豬骨仔去蹄，洗淨，飛水，然後跟老雞、杞子、沙參、玉竹、黨參和北芪，煲個半鐘便可熱辣登場。
蘇老闆試味：豬骨仔的賣點是煮至半透明的筋位，既爽口又吸收了老雞湯精華，入口分外鮮甜美味，成煲湯落足料，不是淡茂茂水汪汪。
白肉是冬瓜，呢個天時食最好不過，把冬瓜切成一圈圈，去瓤，用上湯煨至入味；另一方面起鑊炒蘑菇、鮮菇、冬菇和金菇；只要夾啱Timing，在軟軟熟熟的冬瓜上，就是鋪天蓋地鑊氣十足的雜菇，最後由時菜繞場一周。清淡小菜隨即誕生。
郭太試味：材料全部都消脂清淡，食咗唔怕肥，個冬瓜煮得好入味，又腍身，用湯匙輕力一挖就掂。
當造韭菜花翠綠鮮嫩得細細力就屈斷，如此當時得令，廚師們又點會放過？唰唰幾聲，動作麻利的廚師已把菜花切成段，並順手撒入鍋裏，本來爆得金香的乾葱、蒜頭、指天椒、蝦膏和蝦米，被突襲的菜花嚇得吱吱作響，廚師熟練地兜兩兜來安撫人心，最後材料不分你我團結一致，熱辣登場。
梁氏夫婦試味：碟餸未送到過來，香味已經傳至，韭菜花好爽嫩，其他配料又夠鹹香，調味適中，成碟滿到好似山丘咁，好抵食。
清湯又等於上湯，蘿蔔有清湯加時間的相助，味力倍增，又甜又腍，滾入味後加埋唐芹、冬菜及果皮絲，讓美味再闖高峯！門鱔是海魚，魚身無鱗片，肉質實淨，切段走油，便可跟清湯蘿蔔同爐同煲上枱。
譚氏夫婦試味：魚片炸過之後先落煲既香口又鎖住調味，亦不怕滾到爛茸茸，蘿蔔同個湯都好清甜，唔會腥。
大牌檔的金沙醬是用沙律汁加椰汁、花奶、茄汁和些少牛柳汁撈成，諗起都酸甜香滑；有幸和金沙配搭的是鮮甜爽口的中蝦，先替它𠝹花，後沾粉，再落油鍋，中蝦在滾油裏扭作一團，再披上金沙蓋頂，最後由西蘭花伴着上碟。
李氏夫婦試味：個蝦身雖然撈咗金沙汁，但咬落帶薄脆，脆得嚟又乾身不會太硬，而且蝦肉好爽甜，個汁不會稀如水，吃西蘭花時蘸些金沙汁，味道幾特別。
逢星期一至五供應的$98A及B套餐包三餸一湯，記者推介B餐，因當中有招牌鹽焗雞，還有鴛鴦蛋浸時菜、椒鹽焗生蝦和例湯。日賣四五十隻的鹽焗雞，選用兩斤半黃油雞，先用滾水浸25分鐘，收到柯打後淋上湯伴沙薑出場。
李偉浚試味：好鍾意食鹽焗雞，肉好滑好香又鮮甜；啲蝦卜卜脆，切咗個頭，唔使剝殼。
店名：HOHO牛記海鮮飯店
電話：24642145
地址：屯門礦山村4-8號地舖（約有20個露天車位）
座位：約250個
營業時間：上午11時至凌晨1時
付款方法：只收現金
交通：
可於葵芳地鐵站乘58M或於九龍地鐵站乘260X巴士至震寰路下車；亦可於屯門碼頭乘615或於三聖總站乘505輕鐵於建生站下車，步行約10分鐘。