吳美珩已經係護膚品牌ULTIMAII連續三年嘅代言人，最近佢又幫呢個品牌嘅美白水凝按摩露拍廣告。
身為代言人嘅吳美珩話一直同呢個品牌合作愉快，佢為咗上鏡靚啲重話：「上個月開始，我好努力節食keepfit，連平日最鍾意食嘅零食都唔敢食住，等上鏡嗰陣塊面可以瘦啲。」
吳美珩話今次拍呢個廣告，要坐定定畀人幫佢搽美白按摩露，然後再定定坐低方便攝影師拍大特寫鏡頭。
拍攝期間難免會NG，所以一拍就坐足十三個鐘，佢話今次都拍得幾辛苦。可能因為長時間坐喺度少郁動，難怪吳美珩話拍完廣告，覺得條頸好痠痛。
陳冠希、李心潔同吳彥祖主演、張艾嘉執導嘅電影《想飛》，即將喺台灣上映，身為主角嘅陳冠希同吳彥祖，以及張艾嘉，噚日專登飛去台灣做宣傳。不過，呢部戲早排喺香港上映時票房麻麻，而陳冠希早排又牽涉入毒品郵包事件，佢部戲喺台灣會好成點呢？
張玉珊噚日同助手由泰國返香港，原來佢早前帶埋四個靚女，包括朱茵、蒙嘉慧、安雅同何超儀，齊齊去泰國為「修身堂」拍新一輯廣告。張玉珊話：「廣告拍得好順利，影咗好多相，三點式同無上裝都有。」至於邊位靚女無上裝演出，張玉珊話暫時唔透露住，遲啲先公布喎。
黃伊汶噚日去咗中環出席《生力清啤獻新城有啲嘢Show》記者會。着住緊身T恤嘅佢，身材呼之欲出。
大會司儀快必問伊人有乜嘢優點時，佢都話：「除咗內涵之外，我重有啲身材。」點知現場啲人聽完重發出噓聲。
重有，黃伊汶玩遊戲時被整蠱，整污糟額頭同下巴。
張燊悅同米雪噚日齊齊去咗尖沙嘴，出席香港舞蹈團舉辦嘅「《梁祝》上海劇院演出暨介紹新團員」記者會，佢哋重會喺下星期出發去上海表演。張燊悅話：「今次我覺得好榮幸，可以同一大班舞蹈員喺上海嘅大劇院演出，重有一去到劇院，我就會感覺自己係一個藝術家。」
郭羨妮噚日喺電視城出現，佢話有好嘢介紹，佢最近試過一種好似叫做「火燄採耳」嘅方法減壓，事關佢平時唔係好夠時間休息，做嘢壓力又好大，所以咪試吓用呢啲方法嚟減壓。郭羨妮重話，佢日日打開報紙見到有人自殺嘅新聞，覺得香港人壓力好大，搞到佢自己𠵱家都唔想睇報紙。
韓國人氣女歌手朴志胤早幾日去上海出席「雪碧榜頒獎禮」，佢重去咗上海伊勢丹百貨公司購物，不過去到啲舖頭已經關門，佢好無奈咁走。其後佢同工作人員去咗另一間表行諗住買嘢，點知睇咗一陣佢興趣唔大，逗留唔夠五分鐘就走。
蘇永康下月二十一同二十二號開兩場個唱，噚日佢喺紅磡舉行個唱記者會。康仔話今次開四面台，重會廣邀嘉賓上台表演，其中謝霆鋒重一早喺俾廉署拘捕前已經答應做嘉賓，康仔話：「呢幾日我冇同佢溝通過，到時我盡量請佢嚟。」