近年,豪華七人MPV可算係近年車壇嘅新寵兒,不少歌影視明星、商賈富豪都會以呢類車款作座駕,有不少車輛更係經常要往來中港兩地㖭;而今日《用車報告》嘅主角豐田Granvia,就係其中一個好例子喇。究竟經常要駕駛呢部豐田Granvia,往來中港兩地工作嘅唐先生,除覺得此車空間寬敞舒適之外,重對佢有啲咩評價呢?大家不妨一齊嚟睇睇。
記者:鄭達基
攝影:陳偉林
唐先生滿意原因
經常要往來中港兩地工作嘅唐先生認為,若想喺如此長途嘅車程中,能夠擁有一個舒適嘅乘車或駕駛環境,就必需擁有寬敞嘅車廂空間;而豐田Granvia就正好切合呢個要求,因為佢除咗擁有闊大嘅車廂外,三排以高級真皮鑲嵌而成嘅座椅,亦能增強乘坐舒適度,配合Granvia本身嘅雙趟門設計,乘客進出車廂時亦變得方便。除此之外,呢部Granvia更裝有全車包圍,望落亦見魅力十足㗎。
唐先生又認為Granvia嘅車廂設備甚為齊全,使用時亦見方便;當中前、中排之間及車窗皆備有窗簾,從而可保障車上乘客嘅私隱。另外,此車一台3.4公升V6偈加速力強勁,匹配一套4前速全自動波箱,因而令新車能有出眾嘅性能表現,而此車更備有一套四驅系統,就算喺濕滑嘅路面時,仍能有充裕嘅循迹性。同時,唐先生又覺得Granvia行車時十分寧靜,並無太大嘅噪音傳入車廂;配合高級真皮座椅,因而令車上每位乘客,都能夠感受到一個舒適愜意嘅旅程享受。
至於缺點方面,唐先生覺得Granvia嘅車身稍高,出入部分舊式停車場時或會有些許不便;而唐先生又略嫌Granvia車身較闊,喺泊車時要扭多兩手軚才可順利泊車。但唐先生相信,若廠方能將上述問題改善過來,定能為其搶回不少分數。
唐先生認為富利堡汽車所提供嘅售後服務,絕能令其感到滿意;除新車首年可獲免費保養(損耗性零件除外)之餘,隨後第2至第4年,若用家到富利堡汽車嘅維修服務中心,享用保養服務的話,更只需繳付零件費用及基本檢查費便可。加上服務中心職員專業嘅服務態度、經常有齊各種零件,唔使等候零件抵港才可作修理,以及交車十分準時,亦因而令唐先生感到滿意。
豐田Granvia小檔案
雖然豐田Granvia自在本港推出以來,一直只由水貨車行引入,但仍受一眾明星及商賈富豪歡迎,以作日常代步嘅座駕或保母車之用,因而令Granvia聲名大噪,同時亦獲得天皇保母車嘅綽號;而各車行亦有為Granvia推出多個特別版本,除加裝包圍外,更會增設各項豪華配備,以迎合不同用家嘅口味。另一方面,現時在港發售嘅Granvia,大都以一台3.4公升V6偈作動力核心,馬力輸出充裕有勁,用以驅動此車可謂綽綽有餘。
豐田Granvia3.4規格
引擎: 3378ccV6DOHC
馬力: 180ps/4800rpm
扭力: 30.5kgm/3600rpm
傳動: 4前速自動波
懸掛: (前)雙搖臂(後)半拖曳臂
制動: (前)透氣碟(後)碟式(ABS)
尺碼: 4790×1830×1965mm
輪胎: 205/75R15
軸距: 2985mm
車重: 約1950kg
2002年售價: 約38萬起
現時售價: 約38萬起
用家大募集
如果你係車主,你嘅座駕已落地三個月以上,不論對座駕是讚是彈,我哋都願意將你嘅心聲寫成用家報告,與讀者分享。
郵寄:香港將軍澳工業邨西駿盈街八號《蘋果日報》副刊「車天車地」版「用車報告」收
傳真:27420542
電郵:
(請註明車主姓名、年齡、聯絡電話及車輛型號)