真係柳暗花明又一村，原本以為丹麥鋼門舒米高俾維拉放棄，會喺英格蘭球壇衰收尾，點知話咁快佢就已經簽咗來屆升班馬嘅曼城；不過我求大俠就𢱑晒頭，畢竟舒米高已經三十有八，表現明顯退步，點解曼城領隊基瑾重要簽佢呢？
雖然基瑾話鍾意舒米高係有實力又夠經驗，但我覺得基瑾係「名牌奴隸」至真。因為基瑾一向有鋪買名牌球員癮，佢之前教紐卡素就簽咗舒利亞同艾斯派拿，𠵱家教曼城就簽咗皮亞斯同埋貝高域斯等，效果就有好有唔好；而喺簽咗舒米高之後，基瑾下個目標，更加話係拜仁嘅明星中場艾芬保！
舒米高加盟曼城後打成點，重係未知之數，不過基瑾咁做始終對佢哋今屆喺甲組打得唔錯嘅龍門拿殊唔公平，如果係領隊都淨係睇球員名氣嘅話，咁有潛質嘅球員點上位呀？
中國國腳前鋒謝暉最近際遇認真麻麻，重可能變成「無主孤魂」！事緣謝暉今屆喺亞琛發展唔如意，被借咗番上海申花踢六場波，但佢呢六場表現平平，重同申花教練徐根寶唔妥，應該唔會續約嘞；而亞琛又唔想要番佢，搞到佢兩頭唔到岸。不過，謝暉就話𠵱家唔會諗咁多，專心同國家隊備戰，踢好世界盃先算。
唔好話我求大俠導人迷信，如果紐卡素前鋒舒利亞要喺今季入超聯第二百球，睇怕要去拜神轉運。事關舒利亞喺月初對維拉入咗佢喺超聯第一百九十九球後，一直沉到𠵱家；而最邪就係紐記前晚對打比郡喺佢傷到血流披面出咗場之後，隊波就連入三粒反勝三比二。紐記家陣爭緊歐冠盃資格，如果舒利亞佢再係咁黑仔，領隊卜比笠臣隨時忍痛雪藏佢。
路亞喺紐卡素都踢咗接近兩季，正副選加埋打咗成三十七場，但係要喺前晚對打比郡先至射入佢喺紐記嘅第一個聯賽入球。唔怪得之佢入波之後鬼咁興奮，打咗幾個空翻咁嚟慶祝。不過我求大俠就覺得佢身手更好都冇用，事關佢入球能力咁低，想喺紐記立足真係要多下苦功。咁得閒練打空翻，不如練吓射術好過啦。
活塞教練卡里斯利近排，打成百幾個電話向有份投票嘅傳媒「推銷」自己球員，誓要佢哋得季尾啲肥豬肉獎咁話，聽講有傳媒對佢嘅積極行為都幾感動，點都畀番幾分薄面啦，呢位仁兄咁落力肯定令佢嘅球員對佢死心塌地啦，但佢咁硬銷真係有啲人頂唔順㗎，因其他教練怕以後蔚然成風，以後咪要兼多瓣。