十年前批肥彭嘅勇將小肥張（前香港新華社副社長張浚生），九八年返去教咗二十五年書嘅浙江大學做黨委書記。佢最近來港，已經改口話同肥彭一直係朋友。不過提起肥彭嘅風光待遇，小肥張一啲都唔介意。
梗係啦，皆因浙大都好威猛，佢一見八方就將浙大嘅威水史如數家珍：「浙大規模太大了！有六間附屬醫院，full-time學生四萬幾，part-time學生又有四萬幾……忙到我都沒時間教書！」又抵小肥張咁得戚，皆因這所大學由四間大學合併而成，佔地五點三三平方公里，堪稱「超級大學」，香港嘅大學論規模冇得比，浙大重連續兩年超過北大排名全國第二。
小肥張還透露，香港嘅科大、中大同港大三位校長，連同國內最頂級嘅大學──浙大、北大、清華同復旦等七位校長，組成一個「大學校長聯誼會」。香港最近興講大學合併，唔知香港呢三位校長，會否參考浙大嘅成功經驗呢？
張浚生又話：「我一點也不年輕了，今年六十六歲！」睇唔出佢比阿董還要老一歲！點樣可以保養得咁好？佢話因為大學裏「看到的都是年輕人，增加自己的活力嘛！」
﹙圖﹚提起肥彭最近嘅風光待遇，小肥張一啲都唔介意。
E-mail：