隨着科技發展日新月異，連帶汽車輪胎技術亦受到普羅車迷嘅關注；而當中至有分量嘅法國米芝蓮（Michelin）輪胎公司，至今已有一百多年歷史之餘，佢哋遍布世界各地嘅分廠及生產線，亦聘有員工達13萬名之多，而每日輪胎生產數目，更平均達84萬4千條㗎！向以着重品質、可靠及創新規條下嘅米芝蓮，早前更廣邀亞洲各地傳媒，齊集泰國測試佢哋至新嘅EnergyMXV8輪胎；其實而不華嘅風格，更可謂表露無遺呢！
特約記者、攝影：張以中
查詢：MichelinAsia(HK)Ltd.（28817287）
時下唔少汽車用家，均喜愛上獨特嘅跑車胎紋，及以Racing化嘅輪胎配搭，惟跑車化嘅輪胎實難兼顧抓着力、寧靜及排水能力。然而，呢款米芝蓮全新嘅EnergyMXV8輪胎，卻以針對中型及高性能轎車為主，棄用獨特嘅胎紋設計，改而用上傳統縱向及附有V字新花配搭，除有不錯嘅去水性及對地抓着力外，兩旁圓闊嘅胎肩結構，更有助減低高速巡航下嘅路噪問題。
然而，米芝蓮輪胎一向深受車迷追捧嘅另一元素，會係佢哋對輪胎敢於創新嘅科技同可靠性；正如呢款最新EnergyMXV8輪胎，內裏除有Baz尼龍層，以強化高速下嘅輪胎循迹力外，另一種嶄新嘅GreenX合成橡膠層，更有助延長輪胎壽命及慳油一面。而即將抵港嘅EnergyMXV8輪胎，尺碼分有15至17吋嘅各款型號，據聞售價重會跟同級日本對手相若㖭！