趙飛雲有個97年移民美國嘅老友返咗嚟探親，噚日同佢飲茶，互問近況。原來佢俾公司裁員，就係和黃（013）想買嗰間環球電訊，至於點解美國經濟咁差，俾人裁員重有閒心四圍玩？佢話皆因美國有失業救濟金攞，短期唔使憂，同埋近5年，紐約嘅屋價升咗成倍，一間普通「636」（三層式）嘅磚屋隨時可賣五六十萬美金。佢97年賣樓移民往美國買屋，啱啱食正個升浪，最近賣咗間屋賺唔少，好過打幾年工嘅收入，唔怪得咁風騷。
其實過往香港樓市唔崩潰，股市點跌都影響唔大，經濟會好快復甦，皆因有層樓在手，心理好好多，使錢都放膽啲。可惜董建華上場馬上拮爆個波，搞到香港樓市萬劫不復，𠵱家要醫都醫唔番，香港經濟自然難復甦。
今日政府賣地，上周五美股回穩，納指反彈1.8%，杜指升14點，對港股應該有啲支持。地產股上周五有偷步買盤，至於會唔會繼續炒上，就要睇賣地成績。長實（001）STC嘅%D線喺超賣區回升，準備突破K線，啟示將有反彈，不過現時追入有一定風險，若想中線持有，等佢升破50日線（現處70.5元），或回落至65元吸納，則勝算較高。
趙飛雲