我老公好鍾食外脆內軟嘅多士，為咗經常畀啲新鮮感佢，每次都會塗上唔同嘅醬料，果醬、牛油、花生醬、芝士，總之就款式多多，最近更增添一位新成員，佢就係加拿大特產，楓樹糖漿，佢無蜜糖咁稠咁膩，味道清香，除咗塗多士之外，最啱用嚟點Waffle、HotCake呢類食物，甚至淋喺雪糕上一樣咁滋味。
$50/樽320克
馬莎百貨有售
我肥師奶好嘴刁，罐頭食物唔係隻隻啱食，Heinz就特別得我歡心，因為佢品質有保證，從未令我失望過。
佢除咗茄汁豆出色之外，燒烤味焗豆，同埋咖喱焗豆，都一樣咁有水準，豆身軟硬適中，唔會過腍又唔會太硬，燒烤汁及咖喱汁嘅味道又唔會搶咗豆嘅香味，更註明係無加入人造色素及防腐劑，用嚟做方便餸菜，或者夾麵包都好正㗎。
$9.7/罐200克
惠康超市有售
文：肥師奶