次次睇親旅遊書、各大報章的旅遊版都話到少女峯就要住響因特拉肯Interlaken。這個小城確實有她吸引之處，那是上少女峯及雪朗峯的「源頭」，順道又可遊覽拜恩湖Brienzersee及土茵湖Thunersee，就連旅遊小先鋒嘅我，上次遊瑞士亦在此住上了五日，但總覺得此地商業味很重，失卻了到瑞士真正目的，就是欣賞大自然。所以今次介紹位處少女峯山腰、最新亦是唯一的度假屋，好讓你領略何謂真正大自然之旅！
記者：朱維達
圖片提供：瑞士旅遊局
今年少女峯地區已經提早溶雪，1月份到過位處海拔1,634米的米倫Murren已經變得綠油油（以往那個時候還可以由雪朗峯滑雪至此），而今次介紹最新的度假屋，卻是可以同時欣賞冰川同綠草如茵的「奇景」。
無論你會從Interlaken的左路經格林德威爾特Grindelwald上少女峯，抑或由右路穿過文根Wengen直抵峯頂，都會經過克萊茵斯海德格Kl.Scheidegg上的愛哥冰川Eigergletscher，而該處唯一的度假屋正位處於此，雖然這裏沒有大型食肆、精品百貨，但勝在夠「天然」，打開大門，前面是雪白冰川，屋後卻是青青山邊草，相信少女峯山區中，你很難再會找到有如此平價而又有煞食風景的度假屋！
選擇住喺山腰嘅GuesthouseEigergletscher，除咗面向冰川，背靠草原，重有其他原因：
若果你選擇在因特拉肯留宿，並選擇上山欣賞少女峯純潔無瑕嘅景色，就一定要晨早起身，搭6點35分嘅登山火車，花2小時30分鐘到山頂。因為太陽冒升時，位於山腳的因特拉肯氣溫會比全年積雪的少女峯山區高，逐漸形成煙霞後並向上伸延，太遲到達峯頂，周圍的能見度便會開始降低，直接影響景觀。於是最終結果，你可能需要在天未光便要到達火車站，好辛苦呀！
GuesthouseEigergletscher位處山腰（海拔2,320米，未聽聞過有遊客在此出現高山反應），搭登山火車到峯頂只需約1小時30分鐘，慳番交通時間，唔好唔記得，由少女峯落番嚟你亦一定要經過愛哥冰川，若果你啲行李喺因特拉肯，淨係搭車來回程，唔計等車時間都要花最少5個鐘，一來返到落嚟都成隻deaddog咁，重邊有精神嚟個夜遊？二來相對留喺少女峯玩嘅時候亦少咗好多，花同樣嘅錢，但係留喺峯頂嘅時間就少咗，好唔抵啫！
喺因特拉肯搵B&B（BedandBreakfast）唔難，但搵間平價B&B就一啲都唔易，我上次住五日就換咗三間，一來嫌同人一間房唔係好慣（住喺YouthHostel），其次就係太貴，一般一晚B&B都要約百瑞士法郎（約468港元），今次包一晚住宿同早、晚餐不過55瑞士法郎（約257港元），真係抵到嘔！
GuesthouseEigergletscher
地址：CH-3801Eigergletscher
電話：（41）33-8287866
傳真：（41）33-8287841
電郵：
設施及費用：提供6間雙人房及12間3人房，須提早預約，包早、晚餐，每人55瑞士（約257港元，最多住三晚）。
上到全年積雪的少女峯後，玩滑雪（30瑞士法郎，約140港元）、坐哈斯基狗拉雪橇（6瑞士法郎，約28港元）、滑雪碟（免費）當然唔少得，愛閒遊的，亦可以逛逛冰宮IcePalace、在觀景台欣賞雪峯，要順道一提的是，若果你曾經走馬看過全長22公里、深達700公尺、全歐最長的阿萊奇冰川AletschGlacier，那今次一定要細心觀賞，因為這裏已剛被聯合國列作世界自然遺產。
當你遊完少女峯，提議你可以沿山路經愛哥冰川到小城格林德威爾特，因為這裏每到7至8月便會舉行著名的阿爾卑斯節，身穿民族服飾的表演者便會拿起長號，或是大鬥擲旗技巧；或者到另一邊的文根鎮，在這個無煙城內，你不會看到有汽車，穿梭身邊的就只有馬車、單車同木屋，亦是今次少女峯之旅的必遊點。
出門提一提
簽證：持BNO、特區護照者免簽證，CI持有者則須辦理。查詢：25227147（瑞士領事館）
機票：乘阿聯酋航空經杜拜轉機往蘇黎世，1年有效期票價$6,330。查詢：23900421（學聯旅遊）